脆皮金莎奶黃月餅

相信冇人敢認係奶黃月餅達人，就算連最出名嘅嘉X樓／半X酒店，都未必可保證呀！（一樣有象腳）

講真，做奶黃月餅真係好有學問，好考功夫。就算同一食譜，同一人做，同一做法，出嚟都未必一樣，可以話未到最後，都吾知結果。

幾年前開始自家製月餅（N年前上過堂但冇做過），直到今年，水準先算係穩定左D。如果大家用緊焗爐焗月餅都話難控制，咁我用水波爐就更難捉摸啦！對水波爐出品嚟講，今次算係完美啦！呢個基本奶黃月餅，餡係用左咸蛋黃與奶黃混合，並非奶黃包住咸蛋黃，因我覺得咁會好食d。

每年中秋前後我都忍吾住會買番Ｄ新模片，因我貪靚，貪新鮮，每年都想試吓新花。買買埋埋，冇一百都有幾十啦（模加片）！實在太誇張了。千奇吾好問我邊度買，因年年買都吾同，吾記得咁多啦！哈哈。

材料（約180g麵團）：（8個50g模）

無鹽牛油　　40g

糖粉　　　　24g

蛋黃　　　　12g

全脂奶粉　　12g

低筋麵粉　　70g

吉士粉　　　8g

雲尼拿油　　1g

奶黃餡　　　200g （奶黃餡做法）

餅面：

蛋液　　　　1/2隻

蜂蜜　　　　2茶匙
水　　　　　1/2茶匙

其他：

高粉　　　　適量

做法：

1. 凍牛油切粒加糖、已篩低筋麵粉、奶粉、吉士粉、蛋及雲呢拿油搓勻（快手搓，避免搓出油，忌），然後分割每份20-22g。
2. 將奶皇餡分割每份25-28g
3. 將餅皮按平（周邊薄，中間厚），不要太大片，夠包裹到2/3餡就夠。
4. 放上一粒奶黃餡，餅皮緊貼餡，然後用手虎口位邊轉邊將皮向上推上並收口。
5. 餅模掃上高粉（多餘凳出），麵糰掃上薄薄高粉（多餘掃走），然後將麵糰放入月餅模內（收口向外）。
6. 檯面撒少許高粉，然後將模放在檯面，小心垂直按壓（維持3秒）。
7. 將模放入保鮮盒脫模（已鋪保鮮紙），然後放入冰格，冷藏30分鐘。
8. 放入已預熱250度焗爐焗5分鐘，出爐用畫筆掃蛋液（凸起部份），然後放涼十分鐘，入爐200度焗10分鐘。（水波爐需加多一個焗盤墊底隔熱）
9. 出爐後，掃上糖水，入爐燒／焗3分鐘。
10. 出爐後，放烤架放涼一晚（可用牛油紙蓋著）。
11. 第日可以入盒或包裝，如3天內未食完，要放雪櫃儲存，食前用焗爐150度（不預熱）焗5-10分鐘。

無鹽牛油牌子都有影響，今年我就用呢隻啦！

全部材料用指頭搓勻（要快手，避免搓到出油及起筋）

搓好後分割

雪硬的奶黃，要再搓幾吓，然後分割。

將皮包入餡

印模後，在盒內脫模（先鋪保鮮紙，免黏底）。

冰箱雪半小時，取出放入已預熱250度焗爐，焗5分鐘。

出爐掃蛋，然後放涼10分鐘，再入爐200度焗10分鐘，出爐掃糖水，再燒／焗3分鐘。