吾知我算吾算大陣象呢！因為。。。我今日。。。專登請假嚟包糭呀！哈哈。
舊年開始HEA包糭，吾會再似前兩年咁，地獄式咁去包，搞到第日腰痛手痛。依家學識慢活，做事吾會再比咁大壓力自己，學識放慢手腳，做得幾多得幾多囉，哈哈。仲要限量生產，冇得encore，食到係你嘅福氣，食吾到嘅千奇咪嬲嬲豬呀！
今年本來預算包24隻咸肉糭，6隻花生眉豆糭，總共30隻。點知/可能/或者包得細隻左，最後竟然包左29隻咸肉糭，8隻花生眉豆糭，3隻冇肉冇蛋黃綠豆糭，一共40隻呀！
今次有阿女同媽媽，加媽媽嘅媽媽，三個女人一個墟齊齊包糭。不過佢地都係當玩，所以我只批准佢地包花生眉豆糭，就算失手都可以重新包過。
包完就當然要等食啦！今次都你用智能煲，set左40分鐘，所以好快有得食，順便試吓烹調40分鐘是否足夠。結果係，花生同眉豆都好夠淋，所以即是代表時間OK，咸肉糭就一定冇問題啦！不過穩陣起建，都係試埋好d，結果梗係冇問題啦！但咬口同質地都比花生眉豆糭好，因為係我包囉！我紮得夠實呀！
題外話：婆婆早兩日食過XX酒樓嘅糭，話好難食，試食完我包嘅糭後，大讚好味過街買，話調味啱啱好，就咁食都已經夠晒味，吾洗再點糖/豉油。繼古法年糕後，對我又一激讚。呢d咪就係叫賣口乖囉，下年我識做啦！哈哈。
（前）粉紅繩：花生眉豆糭（媽咪獨愛）
（後）白繩：咸肉糭
糯米 600g
邊綠豆 300g
咸蛋黃 6個（切半）
五花腩 150g（切12粒）
糭葉 24片
綿繩 12條（每條約1米長）
醃料：
1) 五花腩：鹽1/2茶匙、糖1/2茶匙、五香粉1茶匙、紹酒1/2湯匙
2) 糯米：鹽10g、生油50g
3) 邊綠豆：雞粉10g、沙薑粉10g
4) 咸蛋黃：紹酒1湯匙
做法：*包法跟自己喜好
- 五花腩預早一晚醃，放雪櫃備用。
- 糯米，邊綠豆分開浸5小時，瀝乾，加醃料醃一小時。
- 咸蛋去殼，洗乾淨蛋黃表面蛋白黏液，然後加紹酒撈勻。
- 糭葉洗刷乾淨，將葉頭硬枝及葉尖剪去，烚5-10分鐘，再用清水沖洗，瀝乾，用濕布蓋住備用。
煲法：
- 放入智能煲，加水蓋過糭面，set 40分鐘。（或明火烚3小時或至熟）
- 出爐後放一晚（陰涼地方）或至完全攤凍後，放雪櫃保存。
糭葉洗淨，然後烚10分鐘。
糯米，邊綠豆浸5小時。
（橙色盤係花生眉豆糭材料：做法）
瀝乾水份
加醃料醃一小時
準備好全部材料
智能煲煮40分鐘
