南瓜脆皮奶黃月餅

距離終點不遠了，完成今晚呢round後，再做埋聽晚最後一round，就可以收爐啦！今年任務總算順利。。。接近完成，哈哈。

吾知大家有冇發現，我今年嘅產量比往年少呢？因我已學習慢活，盡量不比壓力自己，不強迫自己，想做就做，想懶就懶，感覺真係輕鬆舒服好多，嘻嘻。

今晚我又偷懶，做左懶人版嘅奶黃月餅。實在太容易啦！真係超輕鬆。事關吾洗睇火，吾洗高溫，仲吾洗掃蛋／掃糖水添。

不過，重點係。。。成功率極高，連第一次跟我學做嘅粉絲們都冇失手呢！

出爐有少許裂紋吾洗擔心，因放涼後會減少或消失的。

攤凍一晚後，裂紋已不見了。

（上：攤凍，下：出爐）

材料：（8 x 50g）

餅皮：

無鹽牛油　　40g

糖粉　　　　24g

蛋液　　　　12g

全脂奶粉　　12g

低筋麵粉　　70g

南瓜粉        　8g

［奶黃餡］
金莎奶黃餡    170g（做法按此）

［其他］

高筋麵粉　　適量
月餅模　　　50g

做法：

1. 凍牛油切丁粒，加糖、已篩低筋麵粉、奶粉、南瓜粉，用手指尖搓成沙粒狀。
2. 加入蛋液，用手指好似按摩般搓勻成糰（不要用掌心推/按/壓，以免起筋及搓溶牛油）。
3. 將麵糰平均分割等份（約21g），滾圓，放雪櫃雪15分鐘。
4. 將餅皮隔著保鮮紙按平（外邊薄，中心厚），不要太大片，夠包2/3餡就得。
5. 放上一粒奶黃餡（約21g），將餅皮向上反起緊貼著餡，然後用虎口將餅皮邊轉邊推上，將整粒餡包好及收口（略略搓造圓柱形，直徑要比月餅模口細）。
6. 月餅模內掃上高粉（多餘凳出），餅皮表面也掃上高粉（多餘掃走），然後放入月餅模內（收口向外）。
7. 檯面撒少許高粉，將月餅模放上檯面，小心垂直按壓定型（手要定，不要移位）。
8. 將模移去已鋪牛油紙焗盤上，小心垂直脫模（手要定，不要移位），將整盤月餅放入雪櫃雪30分鐘或以上。
9. 預熱焗爐180度，放入月餅焗7分鐘，轉盤（顏色可均勻d），調低170度焗7分鐘（全程加多一個焗盤墊底隔熱）。
10. 出爐後放涼，待完全冷卻後入盒或包裝。

貼士：

• 選擇牛油好重要，要揀水份少嘅牛油（易溶）。
• 3天內未食完，要放雪櫃儲存，食前用焗爐150度（不預熱）焗5-10分鐘。