九層糕

今日我做嘅係五層糕『低層版』，因為個模細，所以做吾到九層糕『高層版』。

前一排行過鵝頸橋（近燈籠街口），見到有間糕點鋪，於是就買左幾件白糖糕（因我仲未做得似樣），我吾係因為佢d糕好食，只係想回憶吓童年味道啫（間中都會想食）。

間鋪仲有好多款糕點，有芝麻卷、馬蹄卷、糯米糍及缽仔糕等。不過依家好多糕自己都識得做，仲整得好味過佢，所以吾會再比錢去買啦！見佢地有一款黃黃地色嘅千層糕，之前有同事請我食過，其實並無特別，只得甜甜地，煙煙韌韌。

由於我係用波仔嚟蒸，真係好嘥時間，明火應該會快好多，不過一次就蒸得好少。可能矽膠模傳熱慢，第一層蒸左十幾分鐘至凝固，然後每層蒸十分鐘，到最後一層仲要加多15分鐘，足足玩左成個幾鐘呀！仲未收得工架，因為仲要等佢攤凍，脫模，影相，包裝，仲有出Post呢！

搞到12點幾，終於完成晒啦！好攰呀！可以瞓得覺lu。

材料：
木薯粉　130g
粘米粉　30g
蔗冰糖　125g
水　　　400g

做法：

1. 糖加水煲溶，放涼備用。
2. 全部粉混合，加入糖水拌勻至冇粉粒。
3. 將第一層粉漿倒入糕模，大火蒸至凝固，再倒入第二層粉漿，蒸至凝固。如此類推，直至完成，最後一層蒸20分鐘至熟。
4. 出爐後放涼，脫模，切件即可。

＊未食完可用保鮮盒儲存置室溫，最好兩日內食晒，吾可以存入雪櫃。