今日姐姐放假，本來打算煮飯，簡單烚個菜，蒸個肉，再加d料搞掂。點知竟然被阿仔話“咁普通”？！心諗，如果佢要返工，我吾煮添啦！
比佢搞到我又要諗食乜（其實尋日已買定晒餸）。於是我問佢，吾食飯食意粉好母？兩秒吾洗，佢即答“好”，話好過又食飯喎！仲點名要我整「卡幫尼意粉」，然後話好易啫，好簡單啫。
於是我又要上網搵，睇吓片，然後再重組吓各人優點，最後就做左呢個米米版卡幫尼啦！原來真係吾難，真係非常簡單，只要買齊材料，就話咁易啦！
不過呢款意粉吾可以預早做定，一定要即煮即食，遲d都吾得架，因攤凍醬汁就會變得好杰好乾啦！
另外，因為呢款意粉冇乜餸，所以就加重料，等大家可以食得豐富d。
材料：
扁意粉 1包（500g）洋蔥 1個（切碎）
煙肉 1包（切絲）
忌廉 400g
雞蛋 2隻（打散）
巴馬臣芝士 70g
鹽 少許
黑胡椒 少許
蕃茜碎 少許
做法：
- 煲滾大半鑊水，加1-2茶匙鹽及1湯匙油，放入扁意粉，烚約7-8分鐘（我會跟包裝袋指示時間減1分鐘，因我喜歡煙韌d。），視乎個人喜歡淋身d或煙韌d。
- 用另一個爐頭同步進行煮醬汁，首先用少許牛油／菜油爆香煙肉，然後加入洋蔥炒至軟身。
- 洋蔥軟身後，倒入忌廉，再加入芝士，鹽，黑胡椒，蕃茜碎一同煮滾。
- 熄火，加入蛋漿，邊加邊攪，要快手攪勻。
- 將烚好意粉放入醬汁內，快手撈勻，用意粉熱力將汁液收杰（黏附意粉）。
- 上碟，襯熱享用。
*可自由添加：
1）急凍虎蝦肉，解凍後清洗，然後抹乾，加少許鹽和胡椒醃半個鐘。
2）在炒煙肉時加入一同炒，炒熟後將蝦肉取出備用。
3）當忌廉芝士滾起時，將蝦肉回鍋略煮。
準備好所須材料
爆香煙肉
加入洋蔥，炒至軟身。
倒入忌廉，再加入芝士，鹽，黑胡椒，蕃茜碎一同煮滾。
煮滾後熄火
加入蛋漿，邊加邊攪，要快手攪勻。
將烚好意粉放入醬汁內，快手撈勻。
上碟，襯熱享用。
