三色糖手搓年糕

話左吾整又整，鬼叫自己計錯數咩（數漏個），搞到吾夠分添。冇計啦！唯有臨急抱佛腳，開行TURBO，加開一場啦（真係吾再加場啦）！好彩屋企冇野多，材料就多多，隨時隨地都可以加場。

襯姐姐煮緊飯，又未食得飯，咁我咪攝個位入埋廚房搞搞震囉（比我阻住晒，要等到8時入席）。首先煲個糖水，然後再攪個粉，全部獨力一手一腳，冇搵人幫拖架。今次仲有個小插曲，就係用左雜錦糖啦！因為之前整左幾款口味年糕，每樣糖都淨番Ｄ，所以咪嚟個crossover囉。嘻嘻。煲糖水嘅同時，我就同步處理埋個粉，時間一d都冇嘥到。

出爐啦！估吾到混糖嘅效果又幾好喎！好靚仔喎！仲係咁多款年糕中顏色最靚嘅一個呀！

材料：（2盒750ml）

糯米粉　600g
椰糖　　250g
片糖　　100g
蔗片糖　50g
椰汁　　300g
熱水　　300g
生油　　2茶匙

做法：

1. 糖加水煮溶（不需滾），加1湯匙生油拌勻。
2. 糯米粉及椰漿拌勻，加入1-2湯勺熱糖水，用廚師機／木棍／手搓勻（快手），再加入1湯勺糖水，搓勻再加，搓勻再加，直至打成麵糰即可。
3. 將麵團用手繼續搓幾下，搓至幼滑有光澤。
4. 完成後，再用廚師機／木棍／手，將麵團開成粉漿。都係1湯勺糖水，搓完再加，搓完再加，直至開成粉漿。
5. 將粉漿過濾2次（更幼滑），倒入糕模至9成滿，大火隔水蒸60-90分鐘至熟（用竹纖測試）。

貼士：

1. 可在模面放一對筷子（左右兩邊），再放上一隻大過模面的碟或錫紙蓋住（不要密封）。作用是阻隔倒汗水，及避免蒸氣從糕面打入造成凹陷。
2. 可選用自己喜好嘅糖做糕，如冰糖，片糖，蔗片糖，紅糖等。
3. 糖份量可自己加減
4. 如不加椰漿，可全用水取代。
5. 如用手搓，可等糖水放暖後才搓，以免燙傷手。