新年都有好多朋友鍾意食馬蹄糕，馬蹄糕其實一年365日都可以食到，但為左應節，我都會做少少過吓心癮。
馬蹄糕可以室溫食，雪凍食，或煎嚟食。但雪過嘅糕會變了實色，不晶瑩剔透。所以有好多朋友會揀煎嚟食，因當你煎過後，佢會變番透明，真係好神奇。但同時，亦有好多懶人，嚴麻煩，會就咁凍食。嘻嘻，我就是其中一個啦。吾理你鍾意點食，但都一樣咁好食。
食譜內加了吉士粉，與冇加係兩回事呀！如果想回味吓童年時酒樓食到嘅味道，就要試吓啦！
馬蹄雖然有好多切法，但我始終都係最愛拍碎，因為拍碎可保留更多肉汁，最重要係可以食到啖啖馬蹄肉，爽呀！
咪以為我個人好傳統，識做咁多傳統糕點，其實我真係一Ｄ都吾傳統呀！因為我個人鬼主意多多，最鍾意玩花臣，咁做人做糕都可以多Ｄ樂趣啦！
今次做了兩款馬蹄糕，有吉士同冇吉士，大家可以比較吓。
材料：（2盒1L）
馬蹄 600g
馬蹄粉 200g
＊蔗冰糖 200g
水 1000ml
椰漿／奶 40g
吉士粉 20g（可吾加）
做法：
- 馬蹄洗淨，去皮，切拍碎（入保鮮袋）／切片／切粒。
- 馬蹄粉及吉士粉混合，加水400ml及椰漿拌勻。
- 水600ml加糖煮溶，加入馬蹄煮滾，熄火。
- 慢慢逐少倒入馬蹄粉漿，邊加邊攪，拌勻後，如太稀可細火略煮多一陣（小心不要煮杰），稀糊狀就可以。
- 大火隔水蒸40-45分鐘。
＊貼士：
除了主角馬蹄要多外，配角『太古蔗冰糖』都好重要（超市有售）。佢嘅顏色會比普通冰糖深，而味道吾似冰糖只得甜，蔗冰糖係會食到清香嘅蔗味，真係好味好多架。
（有加吉士粉）
（冇加吉士粉）
