賀年糕款式多多，除左傳統蘿蔔糕同年糕外，馬蹄糕都有好多粉絲架，因佢吾太甜，清清地又有咬口，熱食又得，凍食又都得，最啱懶人食（免煎）。
我食馬蹄糕鍾意少甜多馬蹄，而且仲鍾意佢有彈性，吾會淋滋滋。仲有，我一定要用蔗冰糖，因為佢特別香，特別好味（比冰糖或片糖）。真係好味好多呀！
另外，我嘅食譜做法會同坊間有d吾同，我係吾會煮熟個糊先蒸，我會將糊煮至半生熟，入模後個糊會好平滑，蒸出嚟就吾會凹凸不平，大家不防試吓做啦！
材料：（2盒1L）
馬蹄 600g
馬蹄粉 200g
＊蔗冰糖 200g
水 1L
做法：
- 馬蹄洗淨去皮，然後拍碎（入保鮮袋）備用。
- 馬蹄粉加水500ml拌勻浸發15分鐘，然後過濾一次，備用。
- ＊水500ml加糖煮溶，加入馬蹄煮至微滾（不需滾起），離火。
- 將馬蹄粉漿先攪勻，然後逐少倒入糖水內，邊加邊攪拌（芝麻糊狀）。
- 大火隔水蒸40-45分鐘。
＊新手注意：
可將糖水稍為放暖，才加入馬蹄粉漿，拌勻後再微微加熱（不停攪拌），煮至微糊狀態（流質米白色稀糊），即可離火。
重點：不要煮過火，太杰，糕面會掃吾平。令願稀可以再加熱。不過就算煮太杰，都吾會影響味道，只係糕面吾平滑，賣相冇咁靚啫。
貼士：
a）蔗冰糖有獨特香味，比片糖好味好多。
b）馬蹄要拍碎，不要切粒。
c）馬蹄粉可選用「泮塘」
馬蹄洗淨去皮
馬蹄拍碎（黃豆般大）
馬蹄粉加水拌勻，然後浸發15分鐘備用。
蔗冰糖加水煮溶
加入馬蹄煮滾，熄火。
將馬蹄漿拌勻後，倒入糖水內，邊加邊攪，拌勻成半生熟粉糊。
