火鍋沙爹湯底

襯天氣仲凍凍地，要爭取時間打邊爐至得。食火鍋最重要當然係材料新鮮，但湯底都吾可以忽略。不過其實我都冇話要煲個靚湯嚟打邊爐嘅，都係就咁買包現成沙爹湯咋。但今日就一反常態，搞搞新意思，煲左個沙爹湯呀！好特別呢！真係從來冇諗過，竟然會自製沙爹湯，嘻嘻。

亂打亂撞，又比我整左個似模似樣，冇九分都有八分嘅。。。「偽版~方X記」。。。馳名。。。沙爹湯底。我覺得自己真係好有天份。。。偽裝呀！

呢個湯底除左啱火鍋用之外，仲好啱配湯粉麵呀！味道似足越南沙爹生牛河個湯呢！

如果大家吾怕煩（其實一d都吾煩），就不防試吓啦！

材料：
利川花生沙爹醬1樽
家樂牌濃湯寶牛肉濃湯2粒
八角1粒
香葉1片
椰漿150ml
熱水3L

料頭
蒜頭6粒（切片）
蔥頭3粒（切片）
蔥段3棵（切段）

做法：
1）用湯鍋爆香料頭，倒入熱水（小心彈油），煲滾後取出料頭。
2）將料頭放入茶葉袋（封好），放回湯鍋內。
3）加入八角，香葉，沙爹醬及牛肉湯，煲滾後轉細火煲20分鐘。
4）加入椰漿，煲滾後取走茶葉袋，八角及香葉不要，試味（應該夠味，不需加任何調味）。