金桃酥／合桃酥

阿仔同朋友過澳門玩左兩日，竟然會買手信返嚟。佢買左一袋X記金桃酥，仲有一袋肉切杏仁餅添，因為佢朋友話好好食，所以佢咪趁熱鬧買埋一份囉。

幾年前，曾經有位同事都話過好好食，仲請我食過添。印象中，當時係覺得冇特別，仲吾覺得好味。但今次再食，好似同上次有d吾同，好似比之前好左。

所以我咪研究吓究竟係乜材料囉，不過上網搜尋後，都係搵吾到有關食譜。於是我咪唯有估估吓囉。首先，我覺得個外層似合桃酥，而餡就似老婆餅個餡。

好彩屋企有班白老鼠，我至敢膽粗粗嚟個實驗咋，應該吾會太難食掛，哈哈！因為今次係實驗性質，所以吾敢做太多，做幾個試吓先啦！

食後感：雖然冇100%像真度，但都已有六七成相似啦！

迷你老婆餅

一起身就已經八號風球，認真估佢吾到，冇得出街，一家大細屈響屋企，各有各娛樂，大老爺玩佢on line game，大少就霸住部電視機玩PS4，而大少姐就喱埋face time，悶死大少奶我呀！又冇電視睇，又冇電腦玩，無聊到頭痛呀！嗚嗚嗚。

最後悶到忍冇可忍，要搵番Ｄ細藝嚟解吓悶至得啦！整蛋糕？我又吾想喎，曲奇？又冇乜興趣。最後，我揀左樣已經成年都冇做過嘅老婆餅。

好彩上星期買左盒李祥和熟糕粉，尋日又響街市買左包糖冬瓜，加埋屋企有淨固體菜油，咁就齊晒料啦！開得工啦！

今次總算順利過渡，咁又消磨左兩粒幾鐘啦！其實每一part都好順利，只係我慢吞吞，先至搞成兩個鐘啫。

我今日特登做細細粒，又Ｑ又迷你，一口一個，細細粒容易食嗎！

土鳳梨酥（杏仁粉）

最近有位朋友跟我的食譜試做鳳梨酥，竟然得到家人大激讚，最令佢驚喜係.....囡囡一口氣食左兩個。因為佢囡囡平時係吾吼台灣鳳梨酥架，今次竟然仲連食兩個添。食完仲要有讚，話好食過台灣果D多多聲。搞到我朋友（佢媽媽）超有成功感，超開心呢！聽到朋友咁講，連我都開心埋一份，因為我更有成功感。講開又講，其實我都好耐冇整啦！原來對上一次已經係8個月前啦！

早幾日中秋補假，去左fusion（百佳姊妹超市）逛逛，無意中見到佢地有地們金菠蘿，嘩！仲係超巨型呀。呀。呀。呀！未見過咁大個菠蘿架！一個有成2KG以上呀！都係只賣$23.9，咁抵冇理由吾買啫，吾執書嘅我，仲要買夠兩個添（可能個天都想我整鳳梨酥）。就係咁，就抬左兩個返屋企啦！好似拎住成包米咁重，仲要吾就手，好鬼死吉喎，拎死人啦！ 

等左兩日，見個菠蘿都熟得七七八八，就郁手整個鳳梨餡先啦！去完皮刨完絲後再磅吓，嘩！得番一半重量咋，仲隔出成公升汁，超甜呀！要加冰沖淡至飲得呢！都係第一次買到咁正嘅菠蘿，第日吾知仲買吾買到呢！

燒腩仔

有左光波爐，吾洗吓吓開焗爐。係咪好壓韻呢？哈哈。

今日要整一樣人人都覺得好難，又或者麻煩嘅燒腩仔啦！因為有好多人都會話焗親都吾夠脆。其實燒腩仔脆吾脆係關個皮爆吾爆事，要脆就要爆，吾爆咪吾脆囉。明我講咩嗎？嘻嘻。

首先五花腩要肥瘦適中，舊肉吾好咁太厚，如買到太厚吾緊要，將面帶骨果層肉切走就得（可用嚟煲湯，吾會嘥）。太厚會好難熟，同埋肉質會粗糙。燒之前最好將肉風乾吓，然後響豬皮度插好多好多好多孔，越多就越爆，但千其咪插得太深，小心插穿皮下脂肪就吾脆啦！

尋晚放工去惠康買吾到新鮮五花腩，所以買左舊冰鮮五花腩頂檔，醃左一晚後，要將舊肉表面醃料抹走（抹乾淨），仲要印乾水份，再風乾一陣就焗得啦！

因為我份人比較懶，驚焗完要洗餐死，所以我就加左兩塊錫紙墊底囉。嘩！好在我醒目咋，你睇，真係好多油滴出嚟呀！我好鍾意見到呢個效果，因為即是等於食少好多油落肚嗎！吾怪得咁多人都鍾意用光波爐焗豬／羊／雞啦！

零失敗牛油蛋糕杯（光波爐）

大家仲記吾記得我之前去上左德國寶月餅班呀？我咪話過有得食，有得玩，仲有禮物收嘅。尋日，份禮物終於到手啦！

因為我始終都係新手（光波爐），所以我地都係｛了解中｝。為左我地有個好開始，就做一個零失敗嘅牛油蛋糕先啦！等我地感情穩陣d，再向高難度挑戰。

原來光波爐有個自動模式「蛋糕」喎！不如就試試佢比大家睇吓先啦！做法都係同平時一樣，小朋友都做到架。

用後感：

如果大家想緊買大焗爐，但又吾夠位放喎，買部細咩，又驚效果吾好喎，咁就不如考慮吓光波爐啦！因為光波爐只係比電飯煲大dd，但溫度就可以有250度咁高喎，而且仲有齊蒸／焗／燒等等模式，一般細焗爐都未必做到呀！最重要係成品效果理想，一d都吾會差過傳統焗爐，有可能仲好過添。

有優點當然有缺點啦！話晒大家信任我嗎！缺點：不太適合大家庭，因光波爐平面容量比焗爐細，一次滿足吾到大堆頭製作，所以會比效麻煩。

伯爵茶戚風蛋糕

今朝煮定個伯爵奶茶，然後就同阿女出去食個晏，食完晏大家各行各路，佢有佢shopping，我有我行超市，然後快速返屋企，因為我要整蛋糕呀！

呢款蛋糕雖然已整過好多次，但每次都會覺得好好味。蛋糕當中，戚風蛋糕算係我至愛之一，因為少油又軟綿綿，仲好有彈性添。而且仲變化多多，口味多籮籮，真係百吃不厭。

2017中秋節及追月

今年同老爺一家提早做食左中秋飯，所以正日冇飯局，咁咪自己煮番餐囉，梗係要食餐好Ｄ啦！四餸一湯，一Ｄ都吾失禮架。

今日追月就食餐簡單Ｄ啦！吾知會吾會比人炸型呢？

中秋節晚飯

［豆腐豆卜炆燒腩仔］

［西蘭花炒帶子］

［天白花菇扒菜胆］

［大澳蝦醬炸雞］

［眉豆花生栗子章魚雞腳煲西施骨］

追月晚飯

［墨汁墨魚虎蝦意粉］

懷舊芝麻卷

話說星期五去左葵芳新都會飲茶，叫左碟芝麻卷，點知超失望，又淋又冇芝麻香，真係勁吾掂呀！依家出街真係食吾到似樣Ｄ嘅芝麻卷／糕，又貴又吾好食。想食好味嘅芝麻卷／糕，真係吾懶得架，唯有靠自己啦！

其實芝麻糕我都做得多，但芝麻卷！？都係第一次咋。今次第一次試做，因為未掌握到份量（厚薄），所以做得比較厚。不過經過今次實習後，下次應該會做得好Ｄ啦！希望下次可以做得薄Ｄ，層次多Ｄ，捲得靚Ｄ啦！

原來做芝麻卷都吾係咁難，以後又可以多個食法啦！今日除左有芝麻卷，仲有芝麻糕。