古法紅糖年糕 - 2018

最近淘寶買開雪蓮子，順便買埋老冰糖同古法紅糖。因香港買嘅雪蓮子都係雲南生產，所以我咪試吓淘寶雲南雪蓮子囉，應該都一樣啫，但價錢就平香港20%以上喎，如果好食就再encore。另外，見介紹嘅老冰糖同古法紅糖，好似都好好味，所以就買埋嚟試吓囉！其實價錢一d都吾平架，分分鐘仲貴過香港添，不過見佢標籤個“老”同“古法”字句，又講到天然煮製，所以就吸引左我買囉。

收到貨後，立即檢查吓，雪蓮子真係同香港差不多（食過如一樣可再買）。老冰糖就同香港黃冰糖分別不大，所以吾洗再買。至於古法紅糖，望落顏色比片糖深，但就比蔗片糖淺，聞落好有蔗香（平時嘅片糖聞落冇味），如果好食會再encore。

趁今日放假，有少少時候，即刻整番個古法紅糖年糕試吓啦！仲有，要講吓今次嘅糖水，好明顯比片／蔗糖混濁，而味道亦好明顯不同，食到有蔗汁味，而且糖水係冇雜質/渣（沉底），吾洗過濾，可以直接開粉用。

今次係我自己一手一腳由頭到尾做晒架，冇姐姐幫手，所以冇手影相囉！想睇製作過程？就快D去片睇👉古法年糕做法

雪左兩日，非常容易脫模。

（矽膠模，無須掃油）

著番件衫，當堂靚仔晒。

材料：
糯米粉　　540g
澄麵　　　60g
古法紅糖　400g
水　　　　600g
生油           1湯匙

做法：

1. 紅糖加水中火煮溶，然後加入生油拌勻，放暖備用。
2. 糯米粉及澄麵混合，加入1/3糖水搓勻，再逐少加入糖水搓成光滑麵糰。
3. 然後再逐少加入糖水，將麵糰開成粉漿。
4. 將粉漿過濾2至3次，然後倒入模至8/9成滿，大火隔水蒸60至75分鐘或至熟。
5. 出爐後，待完全放涼，便可放入雪櫃，雪兩日以上，就可以脫模切件（可蘸蛋）煎。

貼士：

• 年糕須雪兩天以上才會容易脫模，如非矽膠模具須先掃油。
• 可以放一對筷子在模面（左右兩邊分開放），面放一隻碟或錫紙（大過模，遮倒汗水）。記住錫紙不可密封糕模，因為會令糕面周邊變乾。

~ 古法紅糖 ~
（原裝一餅500g，我註明賣家須打碎。）

~ 糖水 ~

~ 其實呢個缽仔只有掌心咁大架咋（3.5"），好迷你咋，嘻嘻。 ~

~ 燈光定係個模影響，點解兩個吾同色？！哈哈。 ~