鴛鴦（伯爵茶／咖啡）慕士蛋糕

今日係我『珍珠婚』結婚30週年紀念日，所以特登請左一日假嚟準備呢個蛋糕。近幾年，我都會預備一個自家製愛心蛋糕，今年都吾例外。我想做一個新口味，又要冇重複，都要動下腦筋架！

最後，我諗到做一個伯爵茶慕士蛋糕，用埋伯戚茶蛋糕做夾心，成件事就好伯爵啦！點知中途出事，就係慕士份量同業職表現一樣.....吾夠數！哈哈。因為今次用左新模，所以份量都係估估吓，結果.....OMG！吾緊要，好彩屋企仲有忌廉淨，仲有牛奶同咖啡粉，呢個配搭就夠我做一份咖啡慕士啦！總算有驚冇險。

原先嘅伯爵茶慕士蛋糕，就變為鴛鴦慕士蛋糕啦！嘻嘻。鴛鴦我就飲過，但鴛鴦蛋糕就真係第一次啦！咁今次一定吾會重複啦！其實蝦碌經常會出現，只要靈活變通，就冇有怕啦！哈哈哈哈（自我安慰）。

淨左少少咖啡慕士，可以做多一個慕士杯。

（加左朱古力雲石面，再加幾粒石頭朱古力裝飾，即時升呢。）

材料：（7-8"方模）

伯爵蛋糕　　　1片（伯爵戚風蛋糕做法）

伯爵茶慕士：

伯爵茶葉／包　20g

牛奶　　　　　250g

淡忌廉　　　　200g

砂糖　　　　　40g

魚膠片　　　　10g

1. 魚膠片加冰水浸軟，揸乾水備用。
2. 淡忌廉加砂糖打至8成企身，放雪櫃備用。
3. 牛奶加熱，加入茶葉／包浸泡15分鐘，然後隔出奶茶200g（多除少補牛奶）。
4. 放入魚膠片拌溶或隔熱水座溶，放涼／微暖，加入淡忌廉伴勻。
5. 倒入蛋糕模，放入冰箱雪10分鐘，取出放入蛋糕片，然後按貼慕士。

咖啡慕士：

咖啡粉　　　　2茶匙

牛奶　　　　　200g

淡忌廉　　　　200g

砂糖　　　　　40g

Baileys酒　　　2茶匙

魚膠片　　　　10g

1. 魚膠片加冰水浸軟，揸乾水備用。
2. 淡忌廉加砂糖打至8成企身，放雪櫃備用。
3. 牛奶加熱，加入咖啡粉拌勻。
4. 放入魚膠片拌溶或隔熱水座溶，放涼／微暖，加入淡忌廉拌勻。
5. 將慕士倒入蛋糕面，放入雪櫃雪4小時以上，然後脫模享用。