今日做呢款年糕，係參照傳統古老配方，雖然年糕材料看似好簡單，只有糯米粉、粘米粉、大糖和蔗糖4種，不過份量就相當講究。因為如果全部用晒糯米粉，年糕就會不夠彈性，所以會加入適量粘米粉來増加年糕彈性，令口感軟糯不黏牙，彈性啱啱好。比例為10份糯米粉＋1份粘米粉。
至於選糖及油方面，也非常講究，絕對不可以馬虎（對我來說）。有時我對材料都會好執著（煮食），堅持要用到對的材料。這個堅持，就會做到對的食物，如果冇對的材料，令願不做，這就不會錯啦！
年糕用嘅大糖及蔗糖，比例為7份大糖＋3份蔗糖（太多會澀）。買大糖同蔗糖其實都吾容易，我由電器道街市出發（冇）。然後去春映街街市（都冇）。再去馬寶道街市（都係冇）。最後就去到渣華道街市終於有啦），如果再冇就唯有落西營盤一轉啦！
啱啱遇著剛剛，咁啱比我見到蛋檔正在包裝大糖，所以我就立即買左2斤多d啦（可選擇$8／1包兩磚或$10／斤，我揀左以斤計，買左$23有六磚。）。再行前兩步，就見到一檔雜貨鋪放滿蔗糖，而且仲有幾款添，有d有包裝，有d係散裝，有d淺色，有d深色。於是我就周圍裝吓，然後比我裝到地下有個瓦缸，即是代表搵到啦（以缸為記）！但雖然比我搵到我想搵嘅缸，但都要check吓係咪正貨先得。因檔主已預先分裝好（一斤），所以我就唯有靠我個警犬鼻，隔住個袋試吓聞，估吾到真係聞到，仲聞到好香竹蔗味呀！哈哈。於是，我就買左兩斤啦！
返到屋企，當然要立即做實驗啦！試吓係咪真係傳說中咁正。今日雖然冇姐姐幫手，不過就有妹妹（阿女）。阿女都係第一次手搓年糕咋，全程搓左未夠十分鐘，佢就響到鬼殺咁嘈，好攰呀！好攰呀！哈哈。
其實想食好嘢，梗係要付出代價啦！
阿女友情客串，因手套太鬆，所以會經常出現拉手套，而後段因為佢攰，所以駛出摩打手，加上快鏡效果後，真係快過閃電呀！哈哈哈哈。
材料：
糯米粉 410g
粘米粉 40g
增城瓦缸蔗片糖 101g
大糖 236g
水 450g
花生油 1湯匙
做法：
- 蔗糖，大糖加水細火煮溶（不要大滾，免蒸發太多水份），然後加入花生油拌勻，放暖備用。
- 糯米粉及粘米粉拌勻，加入1/3糖水搓勻，再逐少加入糖水，用手搓成光滑麵糰。
- 然後再逐少加入糖水，將麵糰再搓成粉漿（如太杰可加暖水，材料以外）。
- 將粉漿用篩過濾一次（更幼滑及隔走氣泡），然後再直接濾入模至8/9成滿，大火隔水蒸2小時或至熟。
- 出爐後，糕面貼上保鮮紙（防乾硬），待完全放涼後，放入雪櫃儲存。
大糖，顏色帶橙紅，帶有麥芽糖香味，勝過一般片糖做年糕，通常會在農曆新年前買到。
【增城蔗糖】純竹蔗榨汁煮煉而成，真正蔗糖有竹蔗味道，而且一滅就斷。因應季節性，蔗糖顏色都會有不同（深／淺），通常會在農曆新年前買到。
《為了要試真糖味，所以特別分開煮溶。》
大糖（清晰冇渣），味近似片糖，但香不會單甜味。
蔗糖（混濁，但正常。），須隔渣，有竹蔗獨有味道（聞得到也食得到），非一般蔗片糖可代替。
