焙茶雪芳蛋糕（水浴 + 燙麵）

好耐冇出品啦！事關我們（兩公婆加阿女）出走了（大阪京都奈良）。玩左5日，充完電返嚟，再HEA多3日，係時候做番d嘢啦！氹吓阿仔都要嘅（佢冇啖好食）。

今日用左日本買返嚟嘅焙茶粉，做左一個簡單又健康又好味嘅雪芳蛋糕（與戚風／棉花／枕頭蛋糕相同）。

材料：（7x7"方模）

蛋黃　　　4隻

低筋粉　　80g

焙茶粉　　1湯匙（跟個人喜好加減）

菜油　　　30g

牛奶　　　60g

蛋白　　　4隻

砂糖　　　80g

粟粉　　　1湯匙

鹽　　　　少撮

做法：

1. 將菜油加熱至現細泡（不須滾），然後將油倒入已篩低筋粉內，快手拌勻成熟粉漿。
2. 將牛奶分3次加入粉漿內拌勻，然後加入焙茶粉拌勻，再逐一加入蛋黃拌勻。
3. 蛋白加鹽，用打蛋器低速打散，然後轉高速打至大泡沫，將糖分5次加入打至濕性泡沫［提起打蛋棒有長尾巴向下，不是倒勾小三角（過左龍）］，再轉低速打多一分鐘至光滑。
4. 將蛋白霜分3次加入麵糊內拌勻，然後從高處將蛋糕糊倒入己鋪牛油紙蛋糕模內。
5. 蛋糕模在檯面敲兩下，然後放入深焗盤內，再注入室溫水（水喉水）至蛋糕模1/3高度。
6. 放入已預熱160度焗爐（下層），焗50-60分鐘，焗至30分鐘左右，加一個焗盤在上層（擋火），然後繼續焗至完成（熟）。