低溫慢烤叉燒

因為我有儲備梅頭習慣（當遇到靚梅頭時，一定會買左先講），所以今晚吾洗食貴豬啦！其實想食叉燒又有幾難，只係預早買定，預早雪定，然後預早解凍，預早醃定，咁就有得食啦！係咪吾難呢（講就易囉，食果個，嘻嘻）？

其實咁焗法都吾係（我）第一次，只係blog度冇出現過啫（當時未成立）。記得果次買梅頭做叉燒，以為第一刀就係正（最好），點知.....味道係OK嘅，但肉質同口感就.....有D強差人意囉。最慘仲要被屋企人彈三彈四，呢個話好嚡，果個又話乾，總之多多聲氣咁囉，唉！

不過我冇因為咁而放棄，反而繼續鑽研嘗試不同方法，雖然效果始終未如人意（屋企人要求太高）。直到有日，突然醒覺，了解到肉嘅紋路，終於.....皇天不負有心人，比我學識到點揀啱嘅肉啦！仲要配合埋啱嘅切法喎。就係咁，從此開始了我嘅「叉燒」歷程啦！

今日其實冇諗過會出post，所以冇影到相，不過食完後，竟然好有驚喜，覺得有必要記綠在案（重做）。

＊＊只影到一張食淨幾舊嘅相咋，哈哈！

材料：

梅頭　　1 Kg（約10"長 x 1"厚）

生粉　　8湯匙

水　　　少許

醃料：

砂糖　　5湯匙

幼鹽　　1湯匙

雞粉　　1/2湯匙

海鮮醬　2湯匙

蠔油　　2湯匙

芝麻醬　1/2湯匙

生抽　　1/2茶匙

老抽　　1/2茶匙

乾葱茸　1/2湯匙

蒜茸　　1茶匙

紹興酒　1/2湯匙

雞蛋　　1隻

生粉　　2湯匙

掃面：

百花蜜　半豌

做法：

1. 梅頭沖洗乾淨（不須瀝乾），加4湯匙生粉撈勻，醃4小時（放入保鮮盒存雪櫃）。
2. 4小時後，取出沖洗乾淨（不須瀝乾），加4湯匙生粉撈勻。
3. 將全部醃料拌勻，然後放入已撈生粉的梅頭撈勻，放入保鮮盒，存入雪櫃醃兩小時以上或過夜。
4. 取出梅頭（汁留用），放上已鋪牛油紙焗盤（冇加烤架）。
5. 放入已預熱240度焗爐，焗10分鐘，反轉再焗10分鐘。
6. 取出掃上醃汁，100度焗30分鐘（每隔10分鐘掃一次醃汁），反轉再焗30分鐘（每隔10分鐘掃一次醃汁）。
7. 取出掃上蜜糖，240度焗5分鐘，反轉掃上蜜糖，再焗5分鐘。
8. 取出掃上蜜糖，100度焗30分鐘，反轉掃上蜜糖，再焗30分鐘。**如喜歡燶邊，可以每面焗多幾分鐘**

**因我用水波爐，所以會每面Grill多幾分鐘。**