椰汁桂花糕

今日響糕格調買左樽桂花糖，同之前買過嘅都吾同。記得第一次響二德惠買$30，果種係寫住 "糖桂花（釀）"，不過冇睇成份，但好味，質感係糖漿，好多桂花，好香。而第二次因趕住用，所以去左南貨鋪買$20，點知樽糖好似砂糖物體，用時真係要刮砂至刮得出，又冇招紙，又少桂花，得微香，又冇桂花味。今次呢樽係寫住"糖桂花"，成份有糖、桂花、鹽、水，質感係水狀，好多桂花，比起二記果樽仲要多，所以急不及待要試吓佢至安樂。

味道還未試真，初步試過，比二記果樽味道清淡（因天然成份），冇二記咁香濃，但桂花比二記靚，少D黑花。

今次我有出貓，當雪半凝固桂花時（吾啱timing），攪到有輕微結塊，表面吾夠平坦，所以我為了遮丑，臨時加個保護層（椰汁層），咁咪睇吾出囉！係咪好聰明呢？其實係出古惑就真！嘻嘻！

材料：（650ml 盒）

桂花層：

桂花糖 1-2湯匙（試味）

砂糖 50g

滾水 200g
凍水 200g

魚膠片 20g

做法：

1. 魚膠片加冰水浸軟，然後揸乾水備用。
2. 滾水加砂糖及桂花糖攪溶，加入魚膠片，隔水座溶或微波爐叮溶。
3. 然後加入凍水攪勻，倒入模具，待放涼後存入雪櫃。
4. 當雪至半凝固時取出，攪拌一次（令桂花可分佈平均），再放回雪櫃，雪至凝固及冰凍即可食用或加入椰汁層。

• 留意凝固情況，太稀攪吾到，會一樣沉。太杰又攪吾到，會攪到一舊舊。其實亦可選擇吾攪。

椰汁層：（選擇性）
椰漿 50g
滾水 70g
砂糖 10g
魚膠片 6g

做法：

1. 魚膠片加冰水浸軟，然後揸乾水備用。
2. 滾水加砂糖攪溶，加入魚膠片，隔水座溶或微波爐叮溶。
3. 然後加入椰漿攪勻，倒入已凝固之桂花層面，待放涼後存入雪櫃。
4. 雪至凝固及冰凍即可食用。