栗子忌廉蛋糕

早幾日嘅自來材料（一罐900g栗子蓉加一盒甜忌廉），點解？因為有個同事買左，諗諗吓又擺擺吓，終於都放棄吾做，所以就送晒比我收留佢地，事關甜忌廉已到期，吾做吾得。

今日做左兩倍幾份量，搞到。。。有d呢hea。我都係鍾意做細細份多d，吾鍾意搞咁大壇野，有壓力。

其實好少做栗子蛋糕，佳因我吾太好，今次只係第二次做咋。所以造型上，裝飾上，都係隨心隨手隨意咋，應該見得吓人掛？！除左做磅裝外，都做左杯裝，方便派街坊嗎！

材料：（8”）
海綿蛋糕2片（海綿蛋糕做法）

栗子餡：
栗子蓉 250g
甜忌廉 150g
橙酒     10g

忌廉餡：
甜忌廉 150g
魚膠片 2.5g

脆脆餡：
薄脆片    55g
白朱古力55g

做法：

1. 魚膠片加冰水浸軟備用
2. 白朱古力隔熱水座溶，然後倒入薄脆片拌勻。
3. 甜忌廉300g打至企身，然後分成兩份各150g，其中一份稍後拌入栗子蓉。
4. 栗子蓉加橙酒，用打蛋器打至軟滑後，加入已打企甜忌廉拌勻，然後放入唧袋。
5. 魚膠片揸乾水，加少許甜忌廉隔熱水座溶，然後加入已打企甜忌廉內拌勻，放入唧袋。
6. 模底放入一片蛋糕，然後鋪上一層朱古力薄脆，掃平。
7. 在圍邊唧入忌廉，脆脆面唧上半份栗蓉忌廉，再放一片蛋糕，圍邊及蛋糕面唧滿忌廉，掃平，放入雪櫃雪一小時以上。
8. 取出蛋糕脫模，在蛋糕面唧上栗蓉忌廉及裝飾，再雪四小時以上即可。

甜忌廉打至企身

栗子蓉加橙酒打至軟滑

加入已打企150g甜忌廉，拌勻。

白朱力座溶後，加入薄脆片拌勻。

模底放入一片蛋糕

然後鋪上一層脆脆，圍邊唧入甜忌廉。

脆脆面唧上一層栗蓉忌廉，圍邊唧入甜忌廉。

再放入一片蛋糕

圍邊及糕面唧上甜忌廉，掃平，放入雪櫃雪一小時。

脫模

蛋糕面唧上栗蓉忌廉及裝飾，再放入殖櫃雪4小時以上即可食用。