吾知有冇人聽過，北角有間好有歷史嘅椰子鋪，它的名字叫「椰子號」。大大話話我已幫襯過三個不同地址了，仲越搬越遠添。可能因租金關係，所以由最初城市花園地鋪，搬至春映街街市，再搬到依家嘅馬寶道尾。
話說上星期日同阿仔食完晏，一個人不經意地路過「椰子號」，於是就順道入去打個轉，見到門口放左好受歡迎嘅椰汁馬豆糕（放得門口吾放雪櫃，就知快賣清啦！），心思思想買番盒，但見咁細盒都要賣$28，自已整一定貨真價實d啦！所以到最後，我決定買左鮮椰汁自己整。
還記得上一次整左個鮮榨椰汁糕，用左一個椰子肉榨汁，但其實真係冇乜汁架，仲要冇乜椰子味，最慘仲係整餐矇添。所以今次醒目啦！轉買鮮椰汁，不但乾手淨腳，仲要好香椰子味，食就吾洗講啦！可能太耐冇買過鮮椰汁，真係吾知價，原來依家已賣到$44斤啦！好貴呀！
今次做法與平時吾同，首先係轉用鮮椰汁，其次都係材料。今次係我好耐。。。好耐。。。好耐冇做過嘅「粟粉」版。因為有童年陰影囉！我怕怕吾敢做，嘻嘻。話說N年前，見媽媽每次做馬豆糕（其實吾多），都需要接力，係。。。係接力，接力攪。點解？因為煮糊時，真係好費力，如果沒有強力的臂彎，真係會支持吾住，攪到手殘，哈哈。我今次都算係好大勇氣，跳出陰影，好彩可以順利檻過啫。
材料：
鮮椰汁 300g
鮮奶 350g
水 300g
砂糖 130g
粟粉 100g
馬豆 100g
做法：
- 馬豆浸兩小時，然後烚45-60分鐘至淋。
- 粟粉加水開勻
- 鮮椰汁，鮮奶及糖以中火煮滾。
- 轉細火，粟粉漿先過濾一次，然後慢慢倒入，邊加邊攪直至煮滾，最後加入馬豆攪勻，繼續煮多兩分鐘。
- 倒入模，然後*掃平，糕面再緊貼上一張保鮮紙（避免表面變硬），待放涼後存入雪櫃雪四小時以上即可。
*我用矽膠模，倒至十足滿，然後用麵包刮刀，在糊面刮平，咁就會好靚仔，面吾會凹凸不平啦。
< 玫瑰花8連矽膠模 >
