豆沙鍋餅

呢個呢！真係冇諗過會自己做，一款只會出街食嘅甜品【豆沙鍋餅】。

事關上星期做完草莓大福，仲有半份紅豆餡淨，為左要盡快清晒佢，忽然想起呢個甜品，於是咪做吓囉！

其實材料好簡單，只需3樣野，而3樣野我都有齊，咁咪做到呢個平時吾會周街食到，只在上海飯店食到嘅甜品囉。不過我有少少偷懶，因為我只係半煎炸，所以表皮吾夠脆，但自家製算係咁啦！冇緊要掛。其實咁咪食得更健康，少油嗎！仲冇咁肥膩添。

材料：
雞蛋　　2隻
牛奶　　1.5杯
低筋粉　150g

做法：

1. 將蛋打散，加入奶拌勻。
2. 篩入低筋粉拌勻，然後過篩一次。
3. 燒熱平底鑊，掃上薄油，離火加入適量麵糊（約2-3mm厚，太薄易穿，太厚難熟）。
4. 煎熟一面就可以取出（不需反轉煎另一面），然後再煎第二塊，直至完成麵糊。（留少許麵糊掃收口）
5. 將紅豆餡鋪上皮面中間，四邊預留適當餅皮，包好，掃麵糊黏著收口，然後收口向下，放入油鑊炸至金黃色即可。