呢個紫薯蓉雖然係懶人版，但其實一d都吾易做架。懶係因為免炒，難係難在要將紫薯壓蓉後再過篩（想幼滑d），真係做到手殘呀！
做左月餅幾年，原來買買埋埋，都買落吾少月餅模同花片，十幾廿個模，幾十塊花片，真係多到呢。。。（其實已比緊d姐姐啦！）所以今年冇再買啦！今日都係用番前兩年同舊年買嘅花片咋，有幾個原來都未開齋添。哈哈。
今次嘅紫薯皮用左日本紫薯粉，好夠色，好紫呀！而紫心蕃薯，只係街市買（吾係日本貨），比較多根，所以咪要用篩隔吓囉。嗚嗚嗚！
如果大家都想試吓做的話，比個貼士大家，就係要注意牛油，牌子都有影響架。軟硬程度都好有影響，一定吾可以放軟至淋身，用手指按得入，仲凍，仲有少少實就啱。做出嚟嘅餅皮餅吾會瀉，油立立。
材料：（16*50g模）
＜餡＞
紫心蕃薯 350g
砂糖 15g
麥芽糖 1湯匙
無鹽牛油 20g
淡忌廉 15g
糕粉 1湯匙
咸蛋黃 8個
米酒 適量
- 紫薯洗淨，隔水蒸熟，然後撕去皮，用叉將紫薯壓蓉，再用篩隔一次（更幼滑）。
- 加入糖、牛油、淡忌廉、麥芽糖及糕粉扛勻。
- 放入保鮮盒，存雪櫃雪一晚。
- 第二天，將咸蛋黃洗淨，去除表面黏液。
- 咸蛋黃放在已鋪牛油紙焗盤上，噴滿米酒。
- 放入已預熱150度焗爐，焗6-8分鐘（見表面起泡即可），出爐後放涼切開半個備用。
- 雪櫃取出紫薯餡，平均分割每粒22g（包半個咸蛋黃），滾圓，然後放雪櫃備用。
＜餅皮＞
低筋粉 135g
奶粉 25g
紫薯粉 25g
無鹽牛油 80g
糖粉 60g
蛋液 25g
＜手粉＞
高粉
＜掃面＞
蛋液（餅皮用淨蛋液）
糖水（砂糖15g+滾水10g）
- 將全部粉過篩，然後加牛油（凍，但可按得入即可）及蛋液，用手指頭搓勻成糰（快手）。
- 將麵糰平均分割每粒20g，然後包入餡。
- 月餅模（內）灑上高粉，浪勻及凳走多餘的粉。
- 將麵糰搓成圓柱形，小心放入模（收口向外）。
- 檯面灑上少許高粉，然後將餅模放在有粉的檯面。
- 左手固定餅模（下方位置），右手拿著把手，然後大力向下按壓一下（維持3秒後才放鬆)。
- 鬆開把手後，將模放在已鋪牛油紙焗盤上，小心將麵糰推出脫模（垂直）。
- 完成後，將整盤月餅放入雪櫃雪30分鐘。
- 取出月餅，用毛筆在餅面（凸起花紋部份）掃上蛋液。
- 放入已預熱180度焗爐焗15分鐘。
- 出爐後立即掃上糖水
- 月餅放暖後，放上烤架，放涼一晚後可入盒保存。
＊如3天內未食完，要存雪櫃保存，食前用焗爐150度（不預熱）焗10分鐘即可。
今次用呢隻牛油，效果不錯，沒有象腳出現。
呢個餡有15g，會做25g模。
呢個餡有28g，會做50g模。
搓完嘅麵糰仲係凍架，冇油光，又乾爽。
（如牛油太軟搓，麵糰會濕，又淋）。
餡28g，皮20g（做50g模）
餡15g，皮10g（做25g模）
各焗8個，留番8個25g遲幾日先焗
（阿女送朋友）。
呢個焗盤舊年特別買嚟焗月餅，
因為平底。
出爐啦！有少許爆裂，但吾洗擔心，因放涼後會冇咁明顯（冷縮熱漲），
攤一晚後，完全冷卻，便可入盒。
（如未涼夠，仲有濕氣，月餅會容易發霉。）
包靚靚，準備今晚送禮。
