脆皮軟心奶黃月餅（2017新口味）

今年做左幾款新口味奶黃月餅，無論味道同造型，樣樣都非常滿意。重點係。。。終於可以同象腳講拜拜啦！

而今日我做呢款奶黃月餅，都係第一次咋。原先我係想做流心奶黃㗎，但我未有足夠信心同把握，都係。。。留番遲d/有機會/得閒先啦！

軟心餡：(24粒 x 5g)

咸蛋黃　　6個

無鹽牛油　35g

糖霜　　　22g
椰奶　　　1湯匙

吉士粉　　3g

做法：

1. 咸蛋黃洗淨表面蛋白，滾上米酒，放上已鋪牛油紙焗盤，放入已預熱150度焗爐焗8分鐘，出爐後趁熱壓碎，備用。
2. 吉士粉，糖霜，椰漿及室溫牛油拌勻，然後加入蛋黃碎拌勻至幼滑（可過篩）。
3. 然後放入容器或保鮮袋（捲成一條），放入雪櫃雪硬。
4. 將流心餡分割5g粒，滾圓，放入冰箱冷藏至硬身。
5. 組合：將奶黃餡（每粒20g）包入*流心餡（手盡量少接觸流心餡，怕溶），滾圓。

*流心餡超快溶，最好每次攞幾粒包幾粒，吾好全部攞晒出嚟。每包完幾粒就放回雪櫃雪，不要放室溫。

餅皮按　＞　奶黃月餅皮做法

奶黃餡按　＞　奶黃餡做法

奶黃月餅心得按　＞　奶黃月餅小秘訣

將軟心餡放入保鮮袋（或盒），捲成條狀 。

雪實後，取出分割5g／粒。

滾圓（載手套），然後放入冰箱雪硬（雪過夜）。

將奶黃餡分割20g／粒

滾圓

將奶黃餡包入流心餡，然後滾圓，放雪櫃備用。

餅皮分割22g／粒，滾圓。

將餅皮包入奶黃餡，滾圓，然後印模。

印模後，將模放在已鋪牛油紙的焗盤上脫模，然後將整盤月餅放入雪櫃雪30分鐘。

如果想預早做定，可以將整盤月餅雪硬後，轉放入保鮮盒（先鋪保鮮紙），然後放入冰箱冷藏，隨時焗都得。焗前無需解凍，可直接放入已預熱250度焗爐焗5分鐘。

＊圖片已冷藏三日＊

可選用較橙色嘅蛋黃做奶黃餡及掃面

想顏色明顯D，可用半個蛋黃加半茶匙蛋白及兩三滴老抽拌勻。用細毛筆或畫筆沾上少許蛋漿（可在碗邊Hi乾少少），然後在餅面凸起花紋部份輕手掃上。