伯爵茶日式芝士蛋糕（焗）

每次買襯忌廉芝士，總會有一個煩惱，就係吾知點去消滅佢，有時真係諗到頭都大晒架。今日我諗左個新食法，就係伯爵茶味嘅日式芝士蛋糕。日式芝士蛋糕就食得多啦！而且仲係阿仔嘅至愛，今次就試吓以日式芝士蛋糕做基本，再配埋伯爵茶混搭一番，吾知效果會點呢？其實我都係亂試吓咋，吾試又點知好吾好味喎。哈哈。

如果大家喜歡伯爵茶味，呢款蛋糕一定好啱你，因呢個蛋糕伯爵茶味都幾出，伯爵茶味係會由淡至濃慢慢滲出嚟，好有層次，但又吾會蓋過芝士味，令到成件事都好夾。

材料：(8"方模)
忌廉芝士　300g
伯爵茶包　4-5個
鮮奶　　　120g
糖霜　　　25g
粟粉　　　30g
蛋黃　　　3個

蛋白霜：
蛋白　　　3個
砂糖　　　30g

預備：

1. 芝士室溫放軟
2. 牛奶加熱，加入伯爵茶包浸泡，待放涼後，取走茶包，隔出80g伯爵奶茶備用。
3. 蛋糕模底及四周掃上薄薄一層牛油，然後鋪上牛油紙貼緊。

做法：

1. 蛋白低速打散，然後轉高速打至泡沫狀，加入1/2砂糖打勻，再加入餘下砂糖打至企身。
2. 芝士加糖霜打至幼滑，然後逐少加入鮮奶打勻，再加入粟粉打勻，最後分兩次加入蛋黃打勻至幼滑。
3. 將蛋白霜分2次加入芝士糊內拌勻，然後倒入蛋糕模內。
4. 將蛋糕模放入另一個高盤內，注入滾水至蛋糕模的1/3高度。
5. 然後放入已預熱190度焗爐，焗15分鐘至金黃色。
6. 將焗爐調低120度，將蛋糕模從高盤取出，倒走盤內的水，再將蛋糕模放回高盤內，120度焗15分鐘至熟。
7. 蛋糕出爐後立即脫模放涼，放涼後撕去牛油紙。