秘製醬燒豬肋骨

呢個食譜醬料種類比較多，每次做完屋企又會多幾樽醬，哈哈。所以每次買完，都會做多幾次。其實我都好耐冇整啦！因為吾想買咁多醬囉，哈哈。

今次為左搞聖誕大食會，又想食得高級Ｄ，所以就揀左佢啦！其實自己整好經濟咋，一條豬肋骨都只係$60（吾計醬），出街食冇兩舊都食吾到啦！所以呢味菜我都係自己整多過出街食（即係其實好少食）。

米話吾講你知呀！呢個做法係非一般做法，非一般味道，絕對稱得上大師級架，因為佢並非叉燒醬，中式醬（簡單醃）。呢個係西式做法，仲係餐廳做法嚟架。吾信？咁就要自己試吓啦！雖然醃料多，但一定要跟足呀！值得買架，幾十蚊食到餐廳效果，抵啦！

材料：
豬肋骨　　500g

醃料：
蕃茄醬　　3湯匙
ＯＫ醬　　1/2湯匙
ＨＰ醬　　1/2湯匙
ＢＢＱ醬　2湯匙
檸檬汁　　1/2個
黑椒碎　　1.5茶匙
什香草　　1.5茶匙
砂糖　　　2湯匙

做法：

1. 豬肋骨洗淨抹乾，然後用刀仔刺／鎅下底膜骨與骨之間位置（更入味）。
2. 將全部醃料拌勻，然後塗勻豬肋骨，放入密實盒及存雪櫃醃兩天。
3. 雪櫃取出回溫，然後放入已預熱220（肉厚）至240度（肉薄）焗爐，焗15-20分鐘。
4. 取出豬肋骨，掃一層醃醬，再放回焗爐焗15-20分鐘至熟及焦香。