出街食閒閒地都要$4/50得5隻，自己做$30有12隻，真係抵食到呢！今日姐姐放假，又係太太出埸客串嘅時候啦！
今日晚餐由我話事，所以梗係越簡單越好啦！最好就係一鑊熟。首先用焗爐焗個香茅雞翼（免油炸），然後再煮個雪菜肉絲烏冬＋菜芯＋黑松露鮮蝦迷你水餃（一煲搞掂）。其實如果吾係阿仔話返嚟食飯，相信今晚應該會食飯盒，爸爸知道又會話媽媽偏心都似，哈哈。
話說早兩日facebook見到灣仔碼頭有免費試食「黑松露鮮蝦迷你水餃」，而且取貨點又近屋企，取貨日期又夾到，所以我幫阿女登記埋，今日可以一齊去攞。而烏冬又係免費架，係買李錦記產品滿$40送架，仲有4個添。今晚餐飯好抵食，等於半價呀！
材料：
雞中翼 12隻
醃料：
香茅粉 2茶匙
乾蔥頭 3粒（切片）
蒜頭 6粒（切片）
砂糖 1/2茶匙
生抽 1湯匙
老抽 1茶匙
雞粉 1茶匙
胡椒粉 少許
米酒 1湯匙
做法：
- 雞翼洗淨，抹乾水份，加入醃料拌勻，放入雪櫃醃過夜。
- 預熱焗爐230度，雞翼掃走乾蔥及蒜頭，然後撲上生粉（可吾撲），放入焗爐焗15-20分鐘，反轉再焗15-20分鐘至熟即可。