爵士湯

記得第一次煲呢個湯，因為買吾到蜜瓜，所以轉左用哈蜜瓜，點知味道竟然出怪地好。啖湯基本係吾會飲到哈蜜瓜味，哈蜜瓜嘅味道好低調，但就可提升湯嘅鮮味，湯既清甜，仲好香，真係一試難忘。

今日行超市，見到有蜜瓜開箱（$31.90），所以就吾執書買番個。如果大家都想試吓，記住要揀個生d，皮要青，瓜按落要硬。吾好揀皮已變黃及淋身，因已太熟啦！

不過今次我吾係煲呀！今次係燉呀！因為我買左燉盅嗎！當然要用多d啦！平時好少出街飲湯，因為湯梗係要飲住家囉！不但真材實料，而且仲經濟好多添。

呢個燉湯如果出街飲，4人份要三四百蚊，依家自家燉8人份，都只不過二三百，平左又多左，吾洗教都識揀掛！燉湯仲要吾洗理，禁個制就可以有湯飲。

點樣令你屋企嘅男人（老公同阿仔）愛回家，除左識煮飯，煮餸，甜品，仲要靠啖靚湯架！

材料：（3.5L燉盅）
急凍嚮螺頭　　1隻大或2隻細
乾響螺頭　　　1隻（兩）
豬骨／豬展　　各4兩
雞　　　　　　半隻
乾瑤柱碎　　　15g
薑　　　　　　2片
沙參　　　　　20g
海玉竹　　　　20g
蜜瓜　　　　　1/4個（細）

燉湯做法：

1. 乾螺頭洗淨，預早一日浸軟（須放雪櫃，水留用）。
2. 瑤柱用熱水浸1小時
3. 將嚮螺頭，豬骨，豬展，雞，雞腳洗淨及汆水，然後沖洗乾淨備用。
4. 沙參玉竹洗淨，蜜瓜切大件。
5. 將全部材料放入燉盅，最後放入蜜瓜，注入熱水至7/8成滿（因瓜會發脹，須預留空間），燉3小時。
6. 完成後，加少許鹽調味即可。

煲湯做法：

1. 乾螺頭洗淨，預早一日浸軟（須放雪櫃，水留用）。
2. 瑤柱用熱水浸1小時
3. 將嚮螺頭，豬骨，豬展，雞，雞腳洗淨及汆水，然後沖洗乾淨備用。
4. 煲滾3L水，將全部材料放入（除了沙參，玉竹及蜜瓜），煲1.5-2小時。
5. 沙參玉竹洗淨，蜜瓜肉榨汁，將瓜皮及核放入魚湯袋（收口紮好）。然後放入湯內，再煲多1小時。
6. 完成後，加少許鹽調味即可。

＊煲與燉都各有特色，兩者味道同樣美味。燉湯比較清晰，保留材料精華及原汁原味，但對湯怪就可能吾夠喉。