土鳳梨酥（有鹽＋值物牛油）

原來已有一般時間冇做過鳳梨酥啦！記得第一次正式做鳳梨酥，真係落足本錢。我並吾係指材料，而係講緊配件咋。

為左做到一個完美鳳梨酥，可以去到幾盡？真係吾講得笑㗎。首先，我搭同事嘅朋友從台灣幫我網購，買左廿個模加一個手壓棒，如果冇呢套模，我一定吾會開始做鳳梨酥。

有左靚外型後，又想有個靚包裝襯番，於是我再四處搜羅，不過香港實在搵吾到靚嘅包裝，最後唯有淘寶買番嚟，不過就貴左少少囉。為左要靚，成件事完美，都冇計啦！

最後，內涵有啦！賣相都有啦！但始終都覺得未夠完美。一向追求完美（盡量）嘅我，幾經掙扎，最終都屈服買埋部封口機，希望可以密封好d，keep好d，送比人都大體d嗎！嘻嘻。

話說上星期買左兩個菠蘿，本來打算做飯後果，點知原來屋企仲有好多橙同蘋果（擺左成個幾禮拜），見菠蘿已夠熟，遲d食又怕變質，所以想盡快解決個菠蘿，而最佳辦法就係用嚟整鳳梨餡啦！餡仲可以整定放冰箱（可以存半年）。不過我梗係吾會擺咁耐啦！只係雪左幾日啫。

今次我用左新買蘿蔔刨（7mm）刨粗絲，真係刨得好爽呀！吾洗切餐死啦！哈哈！

餅皮材料（約20個）：
有鹽牛油　65g
植物牛油　65g
糖霜　　　40g
蛋　　　　40g
低筋粉　　200g
吉士粉　　20g
奶粉　　　30g

做法：

1. 有鹽牛油室溫放軟，加植物牛油及糖霜打至幼滑，再加入蛋拌勻。
2. 篩入低筋粉，吉士粉及奶粉拌勻。
3. 將麵團分割每粒20g，滾圓備用。
4. 將餅皮按平，包入鳳梨餡，收口向下，放入鳳梨酥模內，然後輕輕按平。
5. 將整盤鳳梨酥放入雪櫃，雪30-60分鐘。
6. 放入已預熱焗爐180度焗爐，焗12-15分鐘至金黃，取出反轉再焗12-15分鐘至金黃即可。
7. 出爐後，將鳳梨酥小心脫模及移放上涼架，待完全放涼後入袋或盒。

鳳梨餡材料（20粒）：

金菠蘿　　2個
砂糖　　　4湯匙
麥芽糖　　4湯匙（試味加減）

做法：

1. 菠蘿去皮去芯，將菠蘿肉刨／切絲，隔出汁液（可雪凍加冰飲）。
2. 中細火將菠蘿加砂糖同炒至收乾汁液（約45分鐘），然後加入麥芽糖炒勻（試味），繼續炒至收乾身（冇汁）。
3. 放入保觧盒或袋，待放涼後存入雪櫃，雪一晚以上才可使用。
4. 製作當日，預先取出鳳梨餡，分割每粒15g，滾圓存雪櫃備用。