第一次加麵粉做日式芝士蛋糕，無論係外型或者質感，其實分別都不大。
咁多款芝士蛋糕，我最吾好就係日式芝士蛋糕，但對仔女反而就最鍾意。其實我比較鍾意食芝士凍餅，因有消化餅低，又有海棉蛋糕夾心，食起嚟冇咁漏（如：雲石芝士，生果芝士）。
今次蛋糕同過往一樣，一樣爆面，嗚嗚嗚！水波爐焗蛋糕始終都爭Ｄ，如果有時間可以試多幾次（可惜我冇quota），掌握啱爐溫同時間，應該會有改善。其實做到咁我都滿意啦（自我安慰）！哈哈。
＊女話鍾意今次質感／口感多d，乾身d，冇以往咁濕潤，但芝士味吾夠。所以下次我會繼續用呢個食譜，但就會買番Kiri忌廉芝士。原來真係一分錢一分貨，食得出架。（今次二德惠買隻MG，吾掂。）
芝士糊：
忌廉芝士 360g
牛奶 150g
砂糖 100g
蛋黃 4個
粟粉 60g
低筋粉 60g
蛋白霜：
蛋白 4個
砂糖 40g
檸檬汁 1茶匙
做法：
- 芝士隔熱水（60度）座軟，用打蛋器（低速）打至幼滑，然後加入砂糖打勻。
- 將牛奶分5次加入打勻，然後再加入蛋黃打勻（打勻一隻才加第二隻）。
- 將低筋粉及粟粉分兩次篩入，然後用手動打蛋器拌勻。
- 蛋白慢速打散，然後轉高速打至泡沫狀。
- 將糖分3-4次加入打勻（最後一次同時加入檸檬汁），繼續打至濕怛泡沫（忌廉狀，出現紋路，提起打蛋棒，末端會見有長尾巴，注意不要短尾巴）。
- 轉低速再打一分鐘（打走大空氣），可令蛋白霜更幼滑。
- 將蛋白霜分3-4次加入芝士糊內拌勻，倒入已鋪牛油紙模具內（如活底模具，要先包好錫紙，確保不會入水）。
- 將蛋糕模在檯面敲兩下（凳走大空氣），然後放入深焗盤內。
- 深焗盤加入水（室溫），水深至蛋糕模1/3。
- 放入已預熱160度焗爐，焗45-60分鐘或至熟（可用竹纖測試）。＊如蛋糕面有爆裂跡象，可加一個焗盤放上層擋火＊
- 出爐後，取出蛋糕模，將蛋糕模在檯面凳兩下，然後脫模，撕走牛油紙，放上烤架放涼，放涼後可放入雪櫃。
芝士隔熱水座軟（我用蒸氣蒸軟）
水波爐蒸左10分鐘，軟晒啦！
用打蛋器打至幼滑
加入砂糖打至混和
分5次加入牛奶打勻
逐一加入蛋黃打勻（打勻一隻後才加第二隻）
篩入1/2粉，用手動打蛋器拌勻。
再篩入餘下粉拌勻
蛋白慢速打至泡沫狀，然後轉高速，分3-4加入砂糖打勻（最後一次同時加入檸檬汁），繼續打至企身（有長尾巴）。
＊打到見有紋路就開始留意變化＊
這個狀態ok，小心勿打過龍。
然後轉慢速，再打多一分鐘。
將蛋白霜分3次加入芝士糊內拌勻
蛋糕模底及圍邊鋪上牛油紙（如用甩底模，要包好錫紙，切勿入水），再放入深模內。
將蛋糕糊倒入模，然後將模在檯面敲兩下，凳走大空氣。
深盤加入水（水溶法），放入已預熱160度焗爐，焗45-60或至熟。
出爐後將模在檯面凳兩下，然後脫模。
撕走圍邊牛油紙
攤凍
攤凍兩小時後，冇凹冇收腰。
爆面收縮後變成裂紋
