「米」豬年 - 豬籠入水『古法年糕』 - 2019

「米」=「米米」，「豬」=「豬年」，「年」=「賀年糕」。即代表米米豬年賀年糕系列正式啟動。今次再配埋個豬頭模，集齊一班豬隊友，係咪更加應節呢？哈哈。

講起『古法年糕』，都算係我嘅賀年糕類別嘅重頭戲，因為我Blog內 "農曆新年" 系列「檢視次數」名列榜首（有接近15,000次觀看）呀！真係冇諗到，原來古法年糕都會有咁多人鐘意。

今年再接再勵，繼續堅持人手搓粉，盛傳傳統做法，做出大家喜歡的古早味道。

由於今年買的增城蔗糖比舊年嘅淺色，所以今次嘅年糕都淺色了，而且甜度都淡了。

材料：（1 x 1200ml 盒）

糯米粉　　　　　400g

粘米粉　　　　　45g

增城蔗糖　　　　115g

大糖　　　　　　268g

水　　　　　　　445g

花生油或菜油　　1湯匙
水（後備）　　　適量

做法：

1. 蔗糖，大糖加水中火煮滾，再轉細火繼續煮溶，最後加入油拌勻，過濾一次，稍為放涼備用。
2. 將糖水逐少加入粉內，用筷子／木棍攪拌成糰後，然後轉用手（戴上手套）搓至光滑。
3. 再逐少倒入糖水，繼續用手搓，搓至變回粉漿形態（如質感太杰，可逐少加水）。
4. 將粉漿用篩過濾兩次（隔走氣泡），然後倒入糕模，大火隔水蒸1小時或至熟。
5. 出爐後，糕面緊貼上保鮮紙（避免吹乾），待完全放涼後，放入雪櫃儲存。＊如用大糕模，不會反轉（糕底向上），就不要緊貼保鮮紙啦！＊

【增城蔗糖】增城黑皮蔗，每年只得冬季一造，收割時間一般在農曆10月至農曆新年前。蔗糖以純竹蔗榨汁煮煉而成。純正蔗糖有竹蔗味道，而且一滅就斷。

【大糖】顏色帶橙紅，帶有麥芽糖香味，勝過一般片糖做年糕，通常會在農曆新年前買到。

糖加水煮溶

出爐後稍放涼

緊貼上保鮮紙

用淨嘅大糖同蔗糖，最好抽真空包裝，然後放冰格儲存。