西汁三文魚扒

最近睇到蘋果報導（詳細內容），原來三文魚可以有助預防脂肪肝，咁以後就要食／煮多ｄ啦！

雖然我都有煮過三文魚，但魚扒就未試過，今次都係第一次。以前煮法不外乎煎又或者炸，但今日就吾同，都係第一次咋。

老實講，煮三文魚扒真係從未試過，今日我都係初哥嚟咋。心諗，急凍三文魚扒一定比冰鮮三文魚腥，點知.....打開包裝.....竟然.....一d都吾腥喎。

雖然只係急凍三文魚扒，但無論賣相、色澤、味道同肉質，都同冰鮮冇分別。最難得係，一向吾鍾意食三文魚嘅爸爸（怕腥），反而係最棒場果一個。

材料：

三文魚扒　　2塊

蒜蓉　　　　1粒

醃料：

鹽　　　　　少許

胡椒粉　　　少許

紹興酒　　　½湯匙

醬料：

荔枝醋　　　1湯匙

茄汁　　　　1½湯匙

ＨＰ汁　　　1湯匙

砂糖　　　　1湯匙

水　　　　　2湯匙

麻油　　　　½茶匙　　　

做法：

1. 三文魚解凍後，洗淨及刮乾淨魚鱗，然後用廚紙抹乾，加醃料醃30分鐘。
2. 燒熱油鑊，三文魚撲上生粉，放入鑊，中火煎至兩面金黃色，然後上碟備用。
3. 燒熱小鍋，加少許油，爆香蒜蓉，加入醬料煮滾。
4. 將醬汁倒上三文魚面即可