原來已有三年冇煮過羊腩煲啦！
1月頭網購凍肉，見到有新產品＂紐西蘭羊腩＂，而且仲做特價，所以就買左兩包試吓。仔女知我買左羊腩，就一直不停吹我煮，足足提住三個禮拜。
因為冰箱已被打爆，所以我專登安排遲D送貨（29/1送貨），大家比Ｄ耐性，吾好咁心急啦！今日終於可以煮啦！大家終於有得食啦！
今次煮法同3年前吾同，除左醬料外，仲加左竹蔗，陳皮同檸檬葉。估吾到味道又真係幾好味喎！不過就功夫多Ｄ囉。
材料：
羊腩 2磅
馬蹄肉 10粒（切半）
冬菇 10隻（細）
炸枝竹 隨意（切段）
竹蔗 2條（切十字成4條）
料頭：
薑 15片
蔥頭 8粒（切半）
蒜頭 6粒（拍扁）
蔥 1粿（蔥花）
醬料：
南乳 1大磚（壓蓉）
柱侯醬 2湯匙
芝麻醬 2湯匙
蠔油 3湯匙
冰糖 適量
檸檬葉 3片
陳皮 3角
紹酒 適量
腐乳醬：
腐乳 6粒
麻油 1湯匙
糖 1/2茶匙
檸檬葉 1片（極幼絲）
做法：
- 羊腩加鹽水浸30分鐘，洗乾淨，然後沖洗幾次至冇血水，瀝乾（筲箕中間要留空位瀝水）。
- 燒熱鑊（白鑊），將羊肉煎至焦香，贊酒，炒勻。加滾水蓋過羊肉，待滖後繼續煮5分鐘（等於汆水）。
- 將羊肉沖洗乾淨，瀝乾（筲箕中間要留空位瀝水）。
- 燒熱油鑊，加入薑片炒至起焦，然後加入蔥頭及蒜頭炒香。
- 加入南乳蓉，柱侯醬，芝麻醬及蠔油，炒至起泡。
- 加入羊肉及檸檬葉炒勻，然後贊酒炒勻，加滾水蓋過羊肉，加入冰糖，馬蹄，竹蔗及陳皮，細火炆30分鐘。
- 加入冬菇及枝竹，炆10-15分鐘後，先取出枝竹（如夠淋），放入瓦煲，然後繼續炆至羊腩淋。
- 完成後，可加1/5茶匙鹽吊味（夠味可以吾加），然後焗30分鐘。
- 將羊肉放上枝竹面，蓋上，原煲翻熱至滾，加上蔥段，閂蓋及在蓋面圍邊贊酒，熄火焗1分鐘。
- 腐乳醬做法：腐乳壓爛成蓉，加糖及麻油撈勻，面放上檸檬葉絲。
羊腩加鹽及水浸30分鐘
準備料頭及材料
豆品鋪可買到已浸軟炸枝竹
羊腩浸鹽水後，沖洗幾次至冇血水，然後瀝乾。（筲箕中間要留空位瀝水）
白鑊將羊腩煎至焦香
加滾水蓋過面，待滾後繼續煮5分鐘。（等於汆水）
將羊腩沖洗乾淨，然後瀝乾。（筲箕中間要留空位瀝水）
薑炒至起焦
加入蔥頭及蒜頭炒香
加入醬料炒至起泡
加入羊肉及檸檬葉炒勻，然後贊酒炒勻。
加滾水蓋過面
加入冰糖，馬蹄，竹蔗及陳皮，細火炆30分鐘。
加入冬菇及枝竹，炆10-15分鐘後，先取出枝竹（如夠淋），放入瓦煲。
