麻糬朱古力曲奇

其實好耐之前，阿女已經點名，話想食麻糬朱古力曲奇，但我就從來冇諗過會整，哈哈。

直至最近，吾知挑起邊條筋（可能patpat痕），走嚟玩呢D。

其實近幾年，我已用homemade做拜年手信，冇再買糖果啦！因為嫲嫲婆婆們都年紀大啦！所以好少食糖果。

今日係我第一次整麻糬曲奇，所以都有Ｄ緊張，好驚麻糬效果吾理想。雖然之前都整過大福／糯米糍，但今次做餡，就真係未試過（食都少）。如做過糯米糍都應該知，個糯米皮如隔夜／雪過都會變硬，所以我好想找一個不變硬嘅方法。

上網搜尋過資料，指麵糰內加入水麥芽，就可以令麵糰雪不硬，係咪真係咁神奇？好啦！今日就嚟個測試。

其實麻糬只須好少水麥芽，不過.....因為買吾到小裝，所以.....哈哈....唯有成桶嚟啦！吾想再周圍搵啦！雖然咁大桶，而且仲有d誇張，但其實只係$33.5咋（如常用，都好抵）。

拉到咁長都吾斷，就知幾軟糯啦！

呢個就係傳說中的拉絲麻糬啦！

麻糬材料：（約600g）［食譜份量可做到約60塊曲奇］

糯米粉　　　　　180g

砂糖　　　　　　60g

牛奶　　　　　　300g

無鹽牛油　　　　30g

水麥芽（水胎）　30g

做法：

1. 糯米粉加糖及牛奶拌勻，然後過濾入模。
2. 加入牛油，大火隔水蒸20分鐘。
3. 完成後，趁熱加入水麥芽拌勻。
4. 然後再用手搓至光滑軟Q麻糬糰（戴手套，小心燙手）
5. 將麵糰放上保鮮紙，然後再蓋上另一張保鮮紙，用麵棍將麵糰碌平。
6. 將麻糬包好，放入冰箱儲存，須要時取出稍回溫即可。

貼士：

• 椰子油或牛油可減緩麵糰老化
• 水麥芽可以增加麻糬穩定性，即使放入冰箱冷藏，也不會變得硬梆梆。

曲奇材料：（約16塊）

低筋粉　　　　100g

高筋粉　　　　25g

無糖可可粉　　20g

泡打粉　　　　1/2茶匙

黃糖　　　　　35g

砂糖　　　　　35g

鹽　　　　　　少撮

雞蛋　　　　　35g

無鹽牛油　　　70g（室溫）

入爐朱古力釘　適量

做法：

1. 牛油加糖及鹽打至幼滑，然後將蛋分兩次加入打勻。
2. 將全部粉過篩加入，拌勻成糰。
3. 分割20g一粒，包入麻糬餡（10g一粒）。
4. 放上已鋪牛油紙焗盤上，面放上幾粒朱古力釘，輕輕按下。
5. 放入已預熱160度焗爐，焗15分鐘至熟。
6. 出爐後，勿移動，待稍涼後才放上烤架放涼。

貼士：

• 可可粉可改用綠茶粉（烘烤用），變麻糬綠茶曲奇。
• 測試曲奇是否熟，可摸吓餅底是否乾爽，如黏手即代表未熟。

水麥芽（水胎）

糯米粉加糖及牛奶拌勻，然後過濾入模。

加入無鹽牛油

蒸20分鐘

出爐後趁熱加入水麥芽拌勻

將麵糰底面各鋪上保鮮紙，碌平。

為方便每次用一份，所以我預先剪定4份，

然後再放密實袋，存冰箱冷藏備用。

準備曲奇

麵糰

取出麻糬，分割10g一粒。

將麵糰分割20g一粒，然後包入麻糬餡，放上已鋪牛油紙焗盤，

面放上幾粒入爐朱古力，輕輕按下。

出爐後，不要立即移動曲奇，待稍涼後，才放上烤架放涼。