最近聽朋友講，話東海堂中午會有木糠布甸賣，仲話好抵食，每盒只須$36咋（牛油蛋糕size），不過我就無緣買到啦！因為放工果時都賣晒。咁我唯有自己整啦！仲抵食添，哈哈。
今日趁有時間，就整番個木糠布甸做甜品啦！不過我又想食得特別d喎，不如就試吓伯爵茶布甸啦！其實木糠布甸我都做過幾次，但就未試過用伯爵茶嚟做，希望會有新驚喜啦！
木糠布甸可以稱得上甜品中最易做之一，仲係消滅忌廉的最快速方法。平時我都係用馬利餅碎，但今次因為做嘅係伯爵茶忌廉，所以驚餅碎會同忌廉一樣色（吾起眼），如用Oreo餅碎咪得囉，不過超市只得夾心Oreo，咁唯有返屋企自己加工啦（將層夾心刮走）！
講開呢隻伯爵茶，係我一位粉絲Iris Clare Li送比我試（iHerb網購伯爵茶），真係好多謝Iris咁有我心。今日終於有機會試啦！當我打完個忌廉，阿女就話要試味，試完仲話「好味呀！」，跟住就影相（茶盒）。呢隻伯爵茶好夠味，味道好濃郁，如果大家都想試，就要去iHerb網購啦！
其實早幾年，我對伯爵茶都吾太試欣賞，但自從做過戚風蛋糕後，我就開始愛上了，而近年加上阿女又愛上伯爵茶甜品，所以我地都會試不同牌子，但今次算係好味其中之一款。
淡忌廉 700g
伯爵茶 7包
煉奶 隨意
Oreo餅 2-3條
做法：
- 將淡忌廉倒入小鍋（一定要無油無水），然後加入茶包，中火煮滾。
- 煮滾後轉細火煮1-2分鐘，熄火後焗至室溫，然後放雪櫃雪一晚（或座冰快速冷凍）。
- 將伯爵茶忌廉座冰水打至企身（忌廉夠凍先打得起），然後加入煉奶打勻即可（試味逐少增加）。
- 將Orea餅擰開，用刀仔刮走夾心，然後將餅打碎。
- 將忌廉入唧袋，先在甜品杯底層唧上忌廉，然後加一匙餅碎，再加一層忌廉，一層餅碎，順序完成一杯（最面一層要係餅碎）。
- 完成後，放入雪櫃雪兩小時以上即可。
伯爵茶
預先準備伯爵茶忌廉
預先準備伯爵茶忌廉
煮完再焗
將茶包隔起
打至企身
將Oreo餅刮走夾心
Oreo餅碎
搞掂晒
