班蘭戚風蛋糕

之前做拉爺糕用淨左3塊班蘭葉，估吾到一星期後嘅今日，仲保持得咁好，冇爛又冇變味。所以今日我就用佢嚟做個班蘭戚風蛋糕啦！睇落雖然好似好簡單，又冇花巧，又冇造型，只係一個平平無奇嘅蛋糕，但其實都吾係諗咁易架。如想做出一個有回彈力，不下陷，不回縮，超軟熟，有口感，又有手感嘅戚風蛋糕，真係吾易架。

加上今次係我第一次徒手脫模，真係有d驚驚呀！哈哈。好彩我都吾失禮，脫到一個完整無缺嘅蛋糕啫。

拉爺糕

又係時候要做吓，因為好耐冇食過啦！

呢款糕最好襯天氣涼做，因為木薯粉做嘅糕吾雪得，雪過就會吾好食啦！如室溫（25度以下）都可以放室溫兩日。如天氣熱的話，最好都係即日清。如天氣熱放室溫，會出水同變壞呢！

伯爵茶牛油蛋糕

今天天氣不設預期，一起身就天陰陰，仲落雨添。冇出街，當然會安排自己做到盡啦！

尋日做伯爵戚風蛋糕用淨ｄ伯爵奶茶，所以要諗辦法用埋佢，吾想做多個戚風，於是就試吓咁做啦！

講真，真係未食過伯爵茶味嘅牛油蛋糕，更未曾做過呢！不過，味道應該都吾會有問題嘅。

味道介紹：淡淡伯爵茶味嘅牛油蛋糕

鹽可頌（偽版）

今日學人做鹽可頌，不過材料只是亂配一通，造型亦係。。。哈哈。千奇吾好笑我喎。

今次捲得吾靚，下次我會做得更好，繼續努力。


*因屋企冇海鹽，所以用左紅酒鹽代替。

芒果芝士蛋糕（凍）

我又買左盒Kiri忌廉芝士（折後$99.8/1kg），每次買親咁大盒，都要做三四次至清得晒。今次又做邊樣先好呢？

其實初時我係想做咖啡雲石芝士蛋糕，但後嚟醒起冰箱有芒果肉，所以就改變主意，做左呢個芒果芝士蛋糕啦！

如果做芝士凍餅，我鍾意加層消化餅打底，然後再加層海綿蛋糕夾心，令蛋糕食到更多層次，味道更豐富。雖然工序同步驟比較多，但可以一次過食到多重口感，都值得嘅。

芝士蛋糕如加入生果茸，消化餅底同海綿蛋糕，食落感覺係會輕型D，清新D同冇咁漏架。

黑麥軟法包

尋晚整嘅煉奶包，估吾到一日就KO晒。所以今日又要再整包，吾係聽日就冇包食啦！今日再做法包，因為想練習多d嗎！

今次鎅得順左，但效果仍有待改進，還需努力。

煉奶餐包

今晚我吾係試鎅花，而係試新買嘅印花片。之前上堂學麵包，見老師用印花片嚟做裝飾，所以我咪買幾個嚟玩吓囉。嘻嘻。

香草黑麥軟法包

今晚為左練習鎅花，所以上網參考吓造型，最後揀左呢款，不過我做得吾夠好，亦鎅得吾夠靚，不過我都好用心做架，希望下次可以做得更好。

鬆糕

經典同懷舊除左可以形容金曲外，其實仲可以用嚟形容呢款糕架。呢款糕其實都算經典，亦夠晒懷舊，大家又覺得啱吾啱呢？

如果想食懷舊野，絕對吾懶得，因為真係要花好多功夫同時間，所以都係買嚟食花算d。為左完成今次實驗，我足足玩左22小時。真係吾講得笑，一d都吾簡單呀！要比過讚自己先。

由零時12點開始，一直搞到晚上10點，真係食到喊呀（太感動）！又或者係喊住食（太辛苦），哈哈！真係啖啖都有血有汗。

如果大家都想整呢款糕，最重要掌握好時間同溫度，因為發酵時間實在太長，處理失當便會送去大口仔啦！所以真係要諗清楚，安排好，計啱數（時間）先至好開始呀！

其實條數都吾難計，只要將第一次發酵7-10小時，加第二次4-5小時，再加第三次4-5小時，仲有加埋蒸1.5小時，咁就係你今次需要製作嘅時間啦！睇見條數係咪會嚇親呢？！

講過秘密比大家知啦！其實。。。我吾鍾意食鬆糕架，之所以做，係因為想做個實驗，試吓老麵種嘅效果咋！我係咪好無聊呢！？係咪得閒得濟呢（可能係）！？

姐姐啱啱食左，佢話好好味喎（可能吾敢say no😂）。姐姐仲話印尼都有呢款糕，會在過年時食到，都係要做一日一夜咁耐。

今次係我第一次做老麵種嚟整糕點，亦可能、或者、應該、多數最後一次。相信大家睇完都未必會做，所以我只是純分享，不寫食譜了。

肉桂卷

已經好耐冇整肉桂卷啦！今日再做，感覺比對上一次手功好左好多，可能係經驗累積掛。哈哈。

今次除左個樣靚左，味道都改良左架，效果我都好滿意。

蜂蜜戚風蛋糕

今日真係好忙呀！做到冇停手。話咁快又放左一日假啦！

首先焗左個戚風蛋糕，真係好鍾意做戚風，因為不但可以做出多款味道，而且仲好好味，食極都吾厭，最重要係冇咁肥。