一口迷你麥提莎冰皮月餅

今日終於試左麥提莎醬啦！味道都OK，但就吾值$42/200g咁貴囉，都係食番一粒粒麥提莎好過。

之前聽有粉絲話用嚟做包，但焗完Ｄ脆芯變淋左吾好食。而我由貫果日開始，就一直打算用嚟做糯米糍餡，其實做糯米糍同冰皮都係差吾多啫，乜佢地吾係姊妹嚟咩？嘻嘻。

記得好多年前，曾經上過冰皮月餅班，但就一直都冇溫習過，原因係乜？係我覺得吾好食。其實學完果堂，試完製成品，真係冇衝動想再做。其實最大問題應該係間學校個食譜吾得。

事隔多年，印象中好似再做過兩次（冰皮月餅），不過只係用預拌粉咋！今日之所以再接受挑戰，全因為樽麥提莎醬囉。講真，d醬其實吾太適合做餡（用粒裝好d），因為太淋/瀉，好難包，都係留番嚟搽麵包/餅算啦！

講番自製果冰皮先，個皮除左比預拌粉平之外，仲好味好多添，簡直令我對自製冰皮完全改觀呢！

因為餡太瀉，所以造型麻麻地，下次用番杰／挺身d餡，效果一定會好好多。

忌廉梳打蜜桃蒟蒻

因為買左新模，所以又要試吓效果先。本來想做一款透明蒟蒻，點知最後都係睇吾透。

話說，星期三惠康送貨嚟，其中包括3枝健康工房雪梨冰糖，一心諗住用嚟整蒟蒻，再加少少蜜桃做餡，造型應該會幾靚。今日晏晝返到屋企，即刻開工，點知變左竹蔗水！原來送錯都吾知。冇辦法啦！唯有諗吓有咩飲品係透明呢？

大家一定會話，咁都得？！冇話吾得嘅，係就係奇怪左D，不過又OK播。都話整蒟蒻好easy啦！有咩飲得就整得架啦！

同一成份，但出嚟顏色竟然係吾一樣架，圓球係偏黃，而杯裝係偏橙。

紅酒豆沙月

舊年中秋前後，買落左好多月餅模同花片，又大又細，加加埋埋，有成十幾個模同五六十片呀！真係吾講得笑，太瘋狂了（好彩只係有限錢咋）。

雖然有排都未到中秋，但見烘烤店已返左新貨（桃山月餅皮同月餅餡），咪幫襯買幾包十卜吓囉，順便試埋未試過嘅新花囉！

首先示範個紅酒豆沙月啦！紅酒皮配豆沙餡，不但靚爆鏡，而且仲好好味添，呢個組合都算得上最佳拍檔。

老婆餅（素食）

經過上次失敗的慘痛經歷，今次我已重拾信心，克服了對中式酥皮的恐懼。

自從上次失敗後，其實我都冇諗過會再做。但經之前做紫薯酥後，我又覺得吾係太難喎！其試過兩種吾同做法，我應該都掌握到中式酥皮製作處理，所以我已經吾再怕啦！

其實失敗每個人都會，我當然亦吾會例外。只要識得從邊度跌低，響邊度企番起身就得啦！哈哈。結果，我終於成功啦！好滿足啊！

今次嘅米記老婆餅，大膽地吾用豬油，轉用固體菜油代替，好彩同用豬油冇太大分別啫（個人覺得），同樣有層次，同樣鬆化，同樣口感，同樣美味。

中式酥皮做法(二)

中式酥皮分兩種，一種是層次分明的，另一種就是看不出的。

今次示範的酥皮，最常用於嫁女餅，又會用於中式點心，如老婆餅，皮蛋酥，叉燒酥和酥皮蛋撻。

蜜桃茶果凍/蒟蒻

又買多兩包蒟蒻粉屋企看門口，太方便，只要有飲品就隨時做到。

今次用左2包蜜桃茶粉，加糖加滾水，再加蒟蒻粉攪溶就完成啦！

試過幾種比例，我覺得15g蒟蒻粉加100水，口感係最好，不太軟又不太韌。

鮮榨椰汁糕

從未試過用新鮮椰子榨汁做椰汁糕，諗住新鮮又天然，所以就厄吓啦！由切椰子開始，原來都吾係咁難啫。到榨汁啦！嘩！好難攪，因為根本冇乜汁，所以加左凍水一齊攪。然後再隔渣，渣就多啦！不過液體就好少。下次都係咪攪／搞，貴D買鮮椰汁好過。

記得細個果時，由於住響中上環，所以有時候父母會同我幾姊妹去大笪地。記得果度有嘢食有嘢睇，好熱鬧。最鐘意係果度嘅東風螺，仲有鮮榨椰汁，夠晒冰凍又好好飲。不過依家都飲吾翻啦！

本來仲諗住可以自己榨到童年味道，點知都吾係我所想，講真，真係有D失望。試完今次實驗後，我都係會用番椰漿算啦！

補充：呢個椰汁糕味道似椰青糕，冇椰子香味。

朱古力心太軟

今日做呢個心太軟，真是非一般的心太軟。因為步驟比較多，比較煩複，所以好耐好耐至會做一次。

呢個心太軟食譜已跟左我十幾年，講真，到現時為止，我仲未搵到一個可以代替嘅食譜。

我個人覺得，如果一個好的心太軟，吾應該只做一個蛋糕糊，雖然蛋糕係有流心，但其實只係未熟嘅粉漿，只可稱之為半熟蛋糕，並吾係真正的心太軟。

我對仔女都好鐘意食呢個心太軟，只可惜媽媽吾願做啫。尋日阿女問我，可吾可以做d西式甜品。可能我最近做太多中點了。嘻嘻。

所以今日特別為阿女做一次啦！吾知又要等幾耐至會有下次出現啦！

椰汁桂花糕

今日響糕格調買左樽桂花糖，同之前買過嘅都吾同。記得第一次響二德惠買$30，果種係寫住 "糖桂花（釀）"，不過冇睇成份，但好味，質感係糖漿，好多桂花，好香。而第二次因趕住用，所以去左南貨鋪買$20，點知樽糖好似砂糖物體，用時真係要刮砂至刮得出，又冇招紙，又少桂花，得微香，又冇桂花味。今次呢樽係寫住"糖桂花"，成份有糖、桂花、鹽、水，質感係水狀，好多桂花，比起二記果樽仲要多，所以急不及待要試吓佢至安樂。

味道還未試真，初步試過，比二記果樽味道清淡（因天然成份），冇二記咁香濃，但桂花比二記靚，少D黑花。

今次我有出貓，當雪半凝固桂花時（吾啱timing），攪到有輕微結塊，表面吾夠平坦，所以我為了遮丑，臨時加個保護層（椰汁層），咁咪睇吾出囉！係咪好聰明呢？其實係出古惑就真！嘻嘻！

海鹽焦糖芝士蛋糕（焗）

每次買Kiri忌廉芝士，都要買一大盒（1kg），每盒都要做幾次芝士甜品，所以當食完幾次芝士甜品後，都會隔一段長時間至再買。

上個月去銅鑼灣心甜買料，所以又買定一盒嚟看門口。

今日本來打算整芝士撻，但因為又要焗燒肉，所以轉左整呢款，諗住可以簡單d。

點知，唉！中伏了。原來做落都吾野少，其實步驟都幾多，整完餅底又要整芝士，好彩屋企有焦糖漿咋，可以做少一part。

呢款芝士蛋糕真係幾好味架，有時間就要試吓做啦！

今次我將做一個8”模份量轉左做小杯仔，竟然可以做到19杯咁多呀！

柚子橙蜜果凍（蒟蒻）/ 南瓜凍糕

嘩！38度呀！熱到呢！真係熱到人都癲呀！

咁熱嘅天氣，梗係要整番d夏日涼品歎吓啦！為自己降降溫，消消暑。

今日呢個甜品小食，真係靚到冇朋友，而且健康又好味，材料仲隨你鍾意，想點整都得。

因為老公鍾意食南瓜，所以特別為佢整少少啦！

登！登！登！登！靚到呢！

芒果布甸

天氣太熱，要整D凍野食吓消暑至得。

話說早排芒果超抵，所以買左好多，點知又食吾切，唯有將佢起肉，攪成果泥放冰箱儲存備用。

由於大熱天時，雪櫃總是常滿（又西瓜，又汽水，又啤酒等），所以根本迫吾落放多一個凍餅（蛋糕），咁唯有向凍糕發展啦！

屋企乜料都有，砌埋就可以變出簡單又好味嘅『芒果布甸』啦！材料非常簡單，步驟又非常容易，三兩下手勢，話咁易就搞掂晒，雪番佢幾粒鐘，今晚就有得食飯後甜品啦！

食後感：

估吾到屋企都做到街嘅味道，真係一模一樣（當然無添加啦），可惜爭咁d芒果肉啫。

中式酥皮做法（一）

中式酥皮一般分兩種，一種是有層次分明，另一種是看不見的。

今次示範的就是層次分明的一款，最常見到應該都非潮州月餅莫屬。

紫薯蓮蓉酥

今日七一回歸紀念日，我當然冇去遊行啦！只係留響屋企，歎住冷氣，做一個從未做過嘅中式點心。

之前做嘅蓮蓉餡，今日可大派用場啦！其實早兩日已用嚟做過蓮蓉包，不過吾靚仔，所以冇post囉！

雖然自家製蓮蓉吾同街食到嘅味道，但配上包點，點心，估吾到又幾好味喎。

今次製作過程可算順利，都容易掌握，而且外貌和造型都好吸引。出爐啦！咦！點解吾係咁爆嘅？點解層次吾夠分明架！好失望，好擔心，會吾會吾好食呢！呢個post出吾出到世呢？

其實大家可以見到呢個post，即代表成功啦！

眼看未為真，食過你至知，原來一d都吾實，真係好鬆化架。希望下次做得更好。