紫薯紅豆糯米糍（又稱麻糬／大福）

之前細妹返香港，話好想食糯米糍，所以我就為佢泡製做左紅豆糯米糍啦！由內至外全人手制造，冇用現成餡料架。我總共做左11粒，其中7粒就比左細妹拎返酒店慢慢食，有2粒係我同姐姐試味，另外2粒就比細佬食晒。

由於上次數量太少，所以連老公仔女都冇得食。哈哈。可能細妹真係好耐冇食，又或者實在太好食or太鍾意食，佢竟然食飽飯仲可以一口氣連食3粒。最後佢分左3日食，但竟然仲可以保持軟熟呀！

見屋企淨左d紅豆餡，又有紫薯粉，不如就加埋嚟做糯米糍啦！吾洗次次白色咁單調。紫薯皮配紅豆餡，應該都幾夾，幾好味。今日整左9粒，大家吾洗詐型啦！人人有份。

不過，我都未開始包，就比阿女發現左，仲要吹我快d包，食完仲要我包多，話要外賣囉，唉！咁又被刧走兩粒啦！哈哈。

材料：（9粒）

糯米粉　　　　90g

紫薯粉　　　　7g

糖粉　　　　　25g

水　　　　　　90g

菜油　　　　　10g
紅豆餡按此　　180g

其他：
糕粉　　　　　適量
紙托　　　　　9個

做法：

1. 全部粉放入大盤內，加水開勻，再加油拌勻（芝麻糊狀）。
2. 倒入傳熱快淺碟內，大火隔水蒸20-25分鐘或至熟透，中途不要開蓋。
3. 當蒸緊時，可處理紅豆餡，平均分割每粒20g，然後滾圓，放冰箱備用。
4. 蒸好麵糰後，取出，用麵包刮刀將麵糰取出，放上保鮮紙，包好放涼。
5. 戴上無粉膠手套（處理食物用款式），將麵糰分割等份，然後隔著保鮮紙按平。
6. 放上一粒紅豆餡包好，然後滾上糕粉，放入紙托。
7. 可用保鮮盒儲存置室溫（陰涼位置），盡快食用。

貼士：

• 不同牌子糯米粉吸水力不同，要自行加/減水，粉漿開成芝麻糊狀就啱。
• 可用椰奶取代半份水，但開勻後會比較杰身，要逐少加水，調節合適流質。
• 糯米糍不可雪，因會變硬不好吃。
• 出爐後，可用木棍揼十幾下（好似做日本年糕咁），令糯米糍更軟糯。
• 麵糰必須用保鮮紙蓋好，避免風乾。
• 膠手套可以藥房或超市買到，不是BBQ果種，因太鬆，不好穿戴。

粉漿倒入碟/盤，大火隔水蒸熟。

紅豆餡分割滾圓，然後放冰箱備用。

用保鮮紙包好麵糰放涼

放涼後，平均分割等份（必須用保鮮紙蓋好）。