冰糖陳皮燉檸檬

原來上次燉檸檬，已經係四月啦！其實早排已經飲晒，只係未有心情再做。

尋晚突然心血來潮，所以咪再encore囉。而且都係時候要燉番d氹吓老公啦！

上次同今次一樣都係我親手刮果皮，一樣刮餐懞。但今次吾同係d果皮風乾後，竟然乾到脆卜卜，冇可能切到絲，唯有剪。

今次吾再多介紹啦！有興趣可睇番第一次post（冰糖陳皮燉檸檬做法）。

脆皮芝士軟心奶黃月餅（2017新口味）

上次整軟心奶黃月餅時淨左Ｄ奶黃餡，但就冇晒軟心餡，所以我轉用左忌廉芝士代替。今次買嘅忌廉芝士比平時淋，真係無法切粒，我唯有盡量搓成圓形，然後再急凍雪硬。

但今日整個製作過程都吾太順利，首先芝士太淋，就算冰左又好快溶，搞到包奶黃餡都雞手鴨腳，好彩到最後都可以順利完成。

今次焗法同平時吾同，冇用到高溫（250度），又冇掃到蛋，更加冇掃蜜糖添。全程180度焗左15分鐘，一take過，絕對係素顏示人，清純嗎？

呢批月餅係阿女訂架，話要請同事食（咪又係我請，搵笨），但款式當然冇得佢揀啦！因我又出錢又出力喎，梗係由我話事啦（阿媽想試新野）！嘻嘻。

脆皮軟心奶黃月餅（2017新口味）

今年做左幾款新口味奶黃月餅，無論味道同造型，樣樣都非常滿意。重點係。。。終於可以同象腳講拜拜啦！

而今日我做呢款奶黃月餅，都係第一次咋。原先我係想做流心奶黃㗎，但我未有足夠信心同把握，都係。。。留番遲d/有機會/得閒先啦！

德國寶光波爐『奶黃月餅工作坊』

今日好開心被德國寶邀請出席『奶黃月餅工作坊』，地點雖然遠Ｄ，但好在有巴士直達咋。今次場地係土瓜灣德國寶專門店嘅開心廚房，廚房非常舒適，佈置白色為主，好簡潔優雅。而工作人員態度十分友善，就連JP都出埋嚟同我地逐個打招呼，然後再親身帶我地參觀陳列室，仲影埋大合照（課堂前後）添，一Ｄ架子都冇。

今日玩得好開心，有得玩，有得食，仲有禮物收，超級正呀！最。最。最開當然係得到老師同其他參加者嘅激讚啦！不過我真係又做得幾好嘅，抵我比人讚。哈哈。

講真，我咁大個女都係第一次用光波爐咋，原來爐仔細細，但表現一Ｄ都吾會比焗爐遜色，真係好適合一般小家庭。

德國寶御用教煮

入爐前（用淨麵糰吾好嘥，整埋曲奇）

出爐啦！完全冇裂冇爆，簡直喜出望外。（連老師都讚我做得最靚，開心死。）

紫薯缽仔糕（Q彈版）

今日試左一個新食譜，味道同以前一樣，只係口感Q左，紅豆轉左紫薯啫。

舊食譜同新食譜有咩分別？其實分別在『粉』。中式糕點粉嘅種類的確非常之多，每種粉都有吾同用途，所以做糕時都會樣樣有Ｄ，有時真係要試過至知咩效果。

每個人要求吾同，有人鍾意淋滑，又有人鍾意爽口，亦有人鍾意Ｑ彈。總之，自家製想點都得啦！哈哈。最重要係屋企有班白老鼠backup。

出籠啦！嘩！睇吓幾紫，顏色好浪漫呀！但點解d紫薯會散晒嘅？得番d粉末狀沉底咋（反轉後變左面，咪以為係污糟啵）。

脆皮金莎奶黃月餅心得分享（水波爐）

今日吾同大家分享食譜，而係分享焗奶黃月餅嘅經驗和心得。

我家係用東芝水波爐（非植入式廣告），與一般焗爐吾同嘅係。。。冇下發熱線，所以爐溫比較難控制同難捉摸。而我今次嘅心得，主要係針對水波爐，所以如用緊焗爐嘅朋友，就要因應番自己部焗爐皮性來調教啦！不過，如果水波爐都做到，一般焗爐就應該吾會有難道啦！

木糠布甸

仲有咩甜品可以快趣起貨，仲又要好味呢？一諗一定諗起佢。順便可以清埋屋企d忌廉，又可以試埋個水晶球模。

木糠布甸做法
*今次轉左用馬利餅，其他不變。

脆皮金莎奶黃月餅

相信冇人敢認係奶黃月餅達人，就算連最出名嘅嘉X樓／半X酒店，都未必可保證呀！（一樣有象腳）

講真，做奶黃月餅真係好有學問，好考功夫。就算同一食譜，同一人做，同一做法，出嚟都未必一樣，可以話未到最後，都吾知結果。

幾年前開始自家製月餅（N年前上過堂但冇做過），直到今年，水準先算係穩定左D。如果大家用緊焗爐焗月餅都話難控制，咁我用水波爐就更難捉摸啦！對水波爐出品嚟講，今次算係完美啦！呢個基本奶黃月餅，餡係用左咸蛋黃與奶黃混合，並非奶黃包住咸蛋黃，因我覺得咁會好食d。

每年中秋前後我都忍吾住會買番Ｄ新模片，因我貪靚，貪新鮮，每年都想試吓新花。買買埋埋，冇一百都有幾十啦（模加片）！實在太誇張了。千奇吾好問我邊度買，因年年買都吾同，吾記得咁多啦！哈哈。