黑糖牛油蛋糕@配鮮菠蘿果醬

早幾日見到Dole金菠蘿特價$15.9，於是就買左兩個。室溫放左兩日，等夠熟先用嚟整鳳梨酥餡。煮好後竟然出乎意料的少，只得1飯碗左右咋。所以唯有打消整鳳梨酥念頭啦（因為整得果幾粒）！其實菠蘿餡仲可以整Ｄ乜？除左做鳳梨酥外，我都試過做果醬，戚風蛋糕，拿破崙。

今日不如又用嚟做蛋糕啦！簡單Ｄ。不過都係嚟亂搭咋，搭個黑糖牛油蛋糕，吾知得吾得呢？！

黑糖牛油蛋糕本身都已好好味（比用砂糖香，冇咁甜，顏色又靚），再配個甜甜酸酸菠蘿醬，清新得嚟又冇咁油膩，都係一個吾錯嘅選擇。

花生酥（花生醬版）

因為屋企有樽大碼花生醬，所以要諗辦法盡快用左佢。咁啱買左斤南乳花生同甜花生，不如就用嚟整花生酥食吓啦！

花生醬版缺點係比較癡口，但味道會比吾用香好多，自已揀用吾用啦！吾用就睇番我d舊post有啦！

紙包蛋糕（不回縮版）

因為印尼姐姐吾食豬肉，所以今晚同場加影，整多款紙包蛋糕。今次試吓低溫長烤，不浸浴方法，睇吓可吾可以不回縮，實驗證明係work嘅！但水波爐焗得吾夠靚，邊有少少爆。

臘腸卷

今日再做中式包，不過加左條臘腸做餡，冇咁單調嗎！不過臘腸都係食少Ｄ好，所以每個只包左1/4條咋。其實我吾鍾意中式包太多餡，鍾意食包皮多過餡。

今次效果依然靚仔，皮光肉滑。連續兩日都係用「美玫」低筋粉，對於口感同效果都非常滿意，以後做中式包可以繼續買「美玫」（$14），吾洗再買「鳥越金明竹」（$28）啦！可以嘥番好多呀！

溫泉蛋臘味飯

今日冇做甜品，只煮左個臘味飯，但並不是一般嘅做法，係加左溫泉蛋同蕃薯架。

重點當然係隻蛋啦！嘻嘻。

水波爐做溫泉蛋，零失敗。做法簡單，只需將蛋放入爐，65度蒸40分鐘，靚晒。

蜜糖杏仁酥（中式合桃酥變身）

因為屋企有d食淨嘅韓國蜜糖杏仁，再吾快d食驚會變淋啦！所以要諗吓計消滅佢。

本來想用嚟整杏仁曲奇架，但需時較長，因要冰硬至做得，所以唯有改變想法，轉左做合桃酥變身版【杏仁酥】啦！

今次加左臭粉（因為屋企有），效果同味道真係同以往做過嘅合桃酥完全兩回事，終於可以做/食到嫁女餅嘅合桃酥味道啦！就係呢個味道啦！

雖然大家都話臭粉吾好，但自家製其實只係落好少份量，應該總比街買/食到嘅健康得多掛！更何況只係間吾中食一次啫，又吾食得多，都吾怕啦！怕就兩份啦！哈哈。

原味戚風伴朱古力醬

自家製真係好自由，鍾意點整就點整，完全冇框框限死架。好似今日呢個蛋糕咁，原先係想做一個忌廉蛋糕，但到蛋糕出爐時，又改變左主意，吾想搞咁多野，所以最後變成清蛋糕加朱古力醬啦！

事關屋企有剩餘黑朱古力，又有剩餘到左期嘅朱古力脆珠，所以咪搞成咁囉！

麥提莎瑞士卷

今日清雪櫃，發現仲有少少淡忌廉同少少麥提莎醬，所以就用嚟整左個麥提莎忌廉啦！但由於份量吾多，吾夠做到一個忌廉蛋糕，所以唯有整左個卷啦！

當捲好後，就包裏放入雪櫃定型，未等到切解封包裝前，就要帶左佢出街送禮啦！所以今次影吾到張靚相post添。

材料及做法可參考：（紫薯瑞士卷做法）

餡：
淡忌廉120g
麥提莎醬4湯匙

做法：
將淡忌廉打至十成企身，加入麥提莎醬打勻，放雪櫃備用。

藍莓燕麥曲奇 + 朱古力燕麥曲奇

一款超容易做，又好味，又感覺冇咁罪惡嘅曲奇，首選必定係你啦！。。。「燕麥曲奇」。。。

今晚食完飯，見屋企冇甜品小食，所以做左個攪兩野就完成嘅簡易曲奇啦！今次半份加左藍莓粒（乾粒），另外半份就加入爐朱古力釘，一次過可以歎齊兩款味道，正！！

雞尾包（少油少甜）

好耐。。。好耐。。。真係好耐冇整雞尾包啦！今次仲係少油、少甜添。

今晚突然興起，好想食個雞尾包做早餐，所以立即坐言起行。今次做嘅雞尾包，係我做過嘅最似模似樣，係最靚仔一次呢！直頭同街買到嘅冇乜分別，最多係我整嘅靚d囉，哈哈！

由於少油版關係，個餡會比較鬆散d（不是一pat），但味道並無影響，一樣咁好味。只要留意分餡時，用手心握實一下就得（好似做壽司飯團咁）。

栗子忌廉蛋糕

早幾日嘅自來材料（一罐900g栗子蓉加一盒甜忌廉），點解？因為有個同事買左，諗諗吓又擺擺吓，終於都放棄吾做，所以就送晒比我收留佢地，事關甜忌廉已到期，吾做吾得。

今日做左兩倍幾份量，搞到。。。有d呢hea。我都係鍾意做細細份多d，吾鍾意搞咁大壇野，有壓力。

其實好少做栗子蛋糕，佳因我吾太好，今次只係第二次做咋。所以造型上，裝飾上，都係隨心隨手隨意咋，應該見得吓人掛？！除左做磅裝外，都做左杯裝，方便派街坊嗎！

鮮榨蔗汁糕

尋日晏晝去左灣仔二德惠買材料，順便去修頓球場附近買鮮榨蔗汁，點知。。。執左笠！唯有轉軚去另一間買啦！嘩！要$20/500ml枝咁貴！

今日先嚟個中式甜品先，原來一枝蔗汁只做到6個咋！自家製，其實成本一d都吾平呀！

鮮椰汁馬豆糕（粟粉版）

吾知有冇人聽過，北角有間好有歷史嘅椰子鋪，它的名字叫「椰子號」。大大話話我已幫襯過三個不同地址了，仲越搬越遠添。可能因租金關係，所以由最初城市花園地鋪，搬至春映街街市，再搬到依家嘅馬寶道尾。

話說上星期日同阿仔食完晏，一個人不經意地路過「椰子號」，於是就順道入去打個轉，見到門口放左好受歡迎嘅椰汁馬豆糕（放得門口吾放雪櫃，就知快賣清啦！），心思思想買番盒，但見咁細盒都要賣$28，自已整一定貨真價實d啦！所以到最後，我決定買左鮮椰汁自己整。

還記得上一次整左個鮮榨椰汁糕，用左一個椰子肉榨汁，但其實真係冇乜汁架，仲要冇乜椰子味，最慘仲係整餐矇添。所以今次醒目啦！轉買鮮椰汁，不但乾手淨腳，仲要好香椰子味，食就吾洗講啦！可能太耐冇買過鮮椰汁，真係吾知價，原來依家已賣到$44斤啦！好貴呀！

今次做法與平時吾同，首先係轉用鮮椰汁，其次都係材料。今次係我好耐。。。好耐。。。好耐冇做過嘅「粟粉」版。因為有童年陰影囉！我怕怕吾敢做，嘻嘻。話說N年前，見媽媽每次做馬豆糕（其實吾多），都需要接力，係。。。係接力，接力攪。點解？因為煮糊時，真係好費力，如果沒有強力的臂彎，真係會支持吾住，攪到手殘，哈哈。我今次都算係好大勇氣，跳出陰影，好彩可以順利檻過啫。

紫薯忌廉香芋蛋糕

Part 2嚟啦！足足等左十多小時！因為出左街，蛋糕又要雪，所以冇得快囉！嘻嘻。

呢個紫薯忌廉同平時忌廉蛋糕吾同，蛋糕層比較多，忌廉層份量相對會薄左，所以食落有咬口得多。

姬松茸響螺雞湯

我除鍾意整野食外，仲好鍾意玩吓煲湯架，因為我家主人好like湯水，無湯不歡。基本上每餐晚飯，都會係三餸一湯，除非吾係，哈哈。

上星期日，專登落銅鑼灣安記（新開張）買海味湯料，今次買左美國響螺頭乾，試吓吾買急凍，睇吓會吾會甜d呢？！

加埋屋企之前買落嘅姬松茸同其他配料，就煲左呢個好好味嘅湯啦！

香芋海綿蛋糕

屋企有d香芋粉淨響度，吾知整乜好，不如就隨意做個海綿蛋糕啦！

今次做全蛋法，會比分蛋難。重點係要用室溫蛋，高W電動打蛋器，最好當然用廚師機啦！隻手冇咁攰嗎！否則打蛋打到手麻痹，打到你你傻，仲要又排都打吾起。（我用左誇張法😂）

好鍾意呢個紫色，高雅得嚟又好浪漫，相信大部份女士們都應該鍾意。出爐時仲超香呀！真係好想即刻咬啖。嘻嘻。

諗住用錫紙包模底貪佢夠方便，點知。。。癡到呢。。。成塊蛋糕底都甩晒。下次都係吾懶得，用番牛油紙自己摺。

今次個面焗得都算靚仔（冇爆裂），可惜只係吾夠平滑啫。

蜜汁豬肉乾

想起豬肉乾，當然會諗起美珍香，不過依家已賣到好貴，差不多$200/1kg，所以都好少會買嚟食啦！

今日襯打風吾洗返工，無端端多日假，咁就吾好嘥左佢，整多樣野食吓先啦！

其實好耐之前，曾經好想自家製豬肉乾，只係一直未排到（懶）啫，今日終於有機會玩吓啦！

不過我有請倡架（偷懶），因為我吾想用手攪肉同撻肉，所以搵左麵包機幫手囉！

麵包機攪肉都好方便，只需將全部材料放晒入包桶，按個制，話咁易就完成啦！夠晒乾手淨腳，哈哈。

肉鬆包+煙燻香腸包

今日8號波，吾洗返工，在家無所事事，唯有搵d野嚟做啦！大家下午茶有著落啦！

抹茶戚風蛋糕

好朋友從日本為我買來的「料理用抹茶粉」，今日終於有機會可以試試啦！

是咁的，因上次他去日本買了飲用抹茶粉給我，我就用嚟做左抹茶牛油蛋糕，但抹茶味道吾夠出。所以他今次再去日本，就專誠為我再買另一款「料理用抹茶粉」啦！多謝晒，好感動ing。

今次不但顏色夠，而且味道也非常不錯呢！ おいしいです！

貝果（原味）

最近食過麥當當嘅豬柳炒蛋貝果，麵包咬口比一般麵包結實（並非吾新鮮果種硬實）。我都幾鍾意呢種口感，所以都想試吓整。

記得第一次做貝果時，都幾失敗架，原因係我冇將每個麵團貼上牛油紙，攪到燙水時呢咁hea，結果。。。樣衰衰囉。

話說買左水波爐都年半啦！其實部爐係有個貝果模式呢！不過一直都未用過，今次終於可以出手啦！點解要跟機做法？因為食譜吾洗將麵團燙水囉！真係方便簡單好多。

杏仁香橙蛋糕杯

靈感呢家野真係好莫名其妙，好似今日呢款蛋糕，真係諗到乜就做乜，完全冇planning架。

一齊從一個橙開始，見到個橙，心諗不如用嚟整蛋糕都好喎！當攪完個蛋糕糊，又諗不如加d橙酒都好喎！到倒左落模，覺得好似又單調左d咁，不如又加d杏仁片裝飾吓都OK喎！就係咁，加吓加吓就變成呢款蛋糕仔啦！

食得啦！食得啦！好香濃橙味呀！