雙重芝士雜肉Pizza

今晚又輪到我要煮飯（因姐姐放假，又吾想食外賣），當然最緊要係簡單啦！所以今晚食碟頭飯。嘻嘻！一罐忌廉雞蓉粟米湯加一pack梅頭，加埋就變成 “show me your love” （翻譯：粟米肉粒）飯啦！為左表示我嘅誠意，仲加多隻荷包蛋添。

但又好似好頹咁，所以就整多一個芝心批啦！整Pizza其實好隨意，屋企有咩就做咩。見雪櫃有茄膏、芝士腸、豬柳漢堡同mozzarella cheese，仲有巴馬臣芝士碎。

用包機打個8分鐘麵團，跟手切材料，啱啱好同時完成。今次特別d，整左芝心批邊，超芝士啊！

嘩！新鮮出爐Pizza，yummy！！

懷舊花生酥

農曆年後都冇出過「酥」啦！又係時候要「酥」Time！不過今次做呢埸「酥」係比較特別，而且仲係大Show添。事關今次係有「酥」錢架。嘻嘻!

其實，間中我都會有d小project，只要夾啱數量、時間和交收，都可以接嚟做吓嘅，不過話晒手作仔，全人手操作，當然吾可以係大Show啦！小小地都可以玩吓。

講真，其實都好有壓力架。每次我都會好緊張，由接單開始，一直到交收完成。驚乜？驚失手囉！俗語有話『老貓燒鬚』嗎！咪話吾驚。

好彩，終於可以順利完成，有覺好瞓啦！安樂晒。希望明天你地收到會滿意啦！

Facebook 粉絲專頁一周年

當年今日，無厘頭開左個粉絲專頁，估吾到竟然有這意想不到的收穫，成績實在令我驕傲和振興，冇辦法吾比個like自己呀！哈哈。

大家估吾估到我點解要開專頁呢？話說我英國嘅妹妹，見我平時咁愛整野食，所以佢經常會叫我放上網賣，又push我開個blog，等人搵吓我做代言人，幫人做推廣，賺吓廣告費或贊助等等。仲話我寫中文，佢幫我翻譯英文添，好想好想搞大佢咁（妹妹咋）。但我其實一直都冇打算將自己製成品出售，只是自娛啫。更加冇諗過有人會找我做代言添。

不過開Blog我真係吾識搞，亦冇乜心去搞，鬼叫我係電腦白痴咩！嗚嗚嗚！其實我本身係好怕煩，吾鍾意諗野，怕諗得多會傷身呀！哈哈！同時亦吾想凡事要求人，因我為人心急，話要即要吾等得，所以喜歡靠自己，親力親為。最後，我只係開左個頭，就被嚇怕失蹤了，嘻嘻！跟住咪Hea左響度囉！

於是我就盲蹤蹤走左去Facebook發展啦！學人開左個粉絲專頁，並由當時「烹飪」轉為現在的「個人部落格」了。真係從冇諗過，亦冇估到可維持到今日呢！

激發我有衝動開頁嘅最大原因，係由我被趕出一個麵包谷開始。被Delete嘅原因就無謂多講，只怪小人（管理員）當道，可能我太受歡迎，搶了她的風頭吧，哈哈。不過這小人亦難途一刧，害人終害己，最終都係out 。雖然谷主有邀我吃回頭草，不過我的心已碎，亦吾想再受傷害。（始終人地個場，吾係自己地頭。）

自始之後，我就忘記過去，重新振作，的起心肝，立定志向，建立一個屬於我嘅「煮埸」。自此之後，我立即升呢，變了CEO，管理員，同埋唯一控制員。以後講乜post乜冇難度。回想起，我有今日真係要多得果位管理員添。

講番個Facebook專頁，係就係方便啦！不過想搵野果時，連我都覺得頭癢。有時要搵其中一樣食譜時，真係要由頭碌到落尾架。最慘係一個吾好彩，仲搵佢吾到添。

所以由2016年3月開始，我就記起有個Blog，於是我就從投它的懷抱了（吃回頭草）。我一步一步慢慢再研究、嘗試、探索和設計。由日到夜，由夜到日，不停捕住部電腦。為左個Blog，將我原來嘅正常生活搞亂晒，除左冇得睇電視外（好彩冇野好睇），仲連覺都瞓少好多呢！所唯萬事起頭難，真係冇講錯架。

搞吓搞吓又運作左個幾月啦！一切也總算順利。相信FB專頁很快就會衝出一萬個讚，而Blog也會突破十萬瀏覽量。能夠在這短短的日子裏，累積到咁多支持者愛戴，真的令我超興奮。

最後，再次多謝大家，記住要繼續追蹤我呀！

26/4/2015

25/4/2016

唧花牛油曲奇

吾知係改良左，還是自己進步左，最近做番好多好耐都吾敢再做嘅甜品，估吾到效果同處理都比以前容易左好多，我吾再怕啦！

所以今日挑戰自己，再試一個同樣好陌生嘅曲奇『唧花曲奇』。點解吾做？因為我唧麵糊唧到手抽筋，而且花紋又會焗到扁晒走晒樣，所以吾鍾意／敢做囉！

雖然今次進行好順利，連唧花都冇難度，但唯一擔心嘅係，因從未試過水波爐焗，吾知佢地夾吾夾得嚟呢！

仲有，今次食譜改良過，我將半份金桶牛油轉為無鹽牛油，原因係我吾鍾意金桶太酥，但全無鹽又怕吾夠鬆。所以最後決定兩溝。

出爐啦！測試結果係。。。失敗！今次Ｄ花紋又走晒，雖然味道比淨金桶牛油好，但又係衰個花，死因我估應該都係怪金桶之過。等我遲Ｄ再試過，希望可以改寫走樣嘅縮命。

手套（一次性）

大家好多時整野食都要用手套，一來衛生，二來戴上後會比徒手做易控制好多添。真係吾講得笑。

以前我只用BBQ果種，極之吾好用，一邊做一邊拉番隻手套啱位，好麻煩。

直至上年中秋，為了包餡整餅，好厚顏地問左按摩師攞一對試吓（點知佢送一盒（S碼）比我，太感動啦！），可惜太細隻，好迫好緊（我有肉地），好吾舒服，仲好難活動。所以我就自己再淘寶番盒（M碼）嚟看門口。盒細碼就留比姐姐用，有時姐姐仲會洗乾淨再重用（清潔食物）添，真識幫我慳家。

真人示範，肥嘟嘟肉手一隻，我的手指特別短，所以啱得手掌嚟又就吾到手指。嘻嘻。

芒果糯米糍

真係話咁快就搞掂啦！

冇呃你架，真係超易做，只需將全部材料撈勻，蒸熟攤凍包埋就搞掂啦！全程吾洗一個鐘，就有得食啦！

桂花糕

超簡單版【桂花糕】

哈哈，為左試新模，求其搵d野嚟做，所以搞左個隨意版桂花糕。下次再試純色，效果應該會更靚。

材料超簡單，鍾意嘅都可以試吓做。

脆皮燒腩仔

話說簡單，但其實超多步驟，要有時間至好試。

有人會選擇買，乾手淨腳。但我會選擇煮，因我鍾意，哈哈！

今時今日香港，想食咩都得，買又得，煮又得，好容易就可以食到。

想當年，童年嘅時候，環境並不富裕，有好多餸菜要等過時過節至有機會食到，如冬菇，新鮮雞，燒肉等。仲有，要等做節至可以飲汽水呀！

講番舊燒腩肉，我由跑水開始，足足搞左半日，咁又冇晒時間做甜品啦！

芒果班㦸

呢款班㦸，好似真係從未做過，又或者N年冇做過，耐到冇印象。

今晚想食簡單甜品，但又冇乜材料選擇，見雪櫃有豬腰芒同忌廉，就不如試吓做呢樣啦！

木砧板

早前淘寶買左兩塊木砧板，諗住用嚟放食物拍攝用。

返到屋企，首先洗乾淨佢，然後塗左一層生油，再風乾一晚，連續塗左三晚（幾層）啦！木嘅顏色已比當初加深了少少。

梅酒

～　分享往年作品　～

清明前後，又係青梅的季節，又到左浸梅酒嘅時候啦！

不過今年我冇浸，因為舊年浸嘅都仲未飲晒。

如果大家都想試吓浸嘅話，就好快ｄ手，趁仲有青梅賣嘅時候，遲左得番黃梅就冇得浸啦！

原味梅酒（加冰）

伯爵茶梅酒（加冰）

桂花拉糕

今晚冇甜品食，所以唯有快快趣整呢個，因為佢超容易，勁簡單，而且仲好好，確實係快靚正！

但今次試吓改少少，轉用蜂蜜片糖代替糖霜，諗住可以再香Ｄ。你睇，雖然膚色變左健康嘅古銅色（淺啡色），但同樣咁好味。

杏汁白肺湯

今日係開頁以來，第一次同大家講湯水篇，仲係我咁大個女第一次煲嘅湯水添！飲就飲得多，親手煲真係未試過，亦未諗過。

以前都係媽咪幫我買，幫我煲。點解今次我會自己煲？因為尋晚突然想煲比老公飲囉，嘻嘻。

所以今朝一早起身就去行街市，諗住親自去買豬肺，應該會好過叫姐姐去買掛（怕姐姐比人呃或吾識買）。

去到豬肉檔，吾見有豬肺掛出嚟，所以開聲問豬肉佬有冇，佢話有，問我要幾多個？我問番佢轉頭應該要幾多個？佢答四人份量買一個就夠，於是我就買一個啦！

豬肉檔多數會幫人洗埋，所以我至會買咋。依家一個豬肺洗埋要$35，其實我都吾知算吾算貴。再買埋豬脊骨$55（冇咁油）同雞腳一齊煲，應該都好夠甜啦！

燕麥饅頭

尋日d墨汁包雖然仲未食晒，但又吾夠聽日做早餐喎，所以唯有立刻走去整個饅頭麵團。

點知屋企吾夠中筋粉，於是轉左燕麥片代替。整個製作過程裏，麵團嘅表面都比較粗糙，比起原味饅頭明顯冇咁光滑，好在味道搭夠。

墨魚汁香草／芝士法包

今晚做左個已經停產好耐，膚色黑黑實實，造型又烏卒卒嘅。。。墨魚汁法包。可能有好多粉絲見到都會被嚇親，鬼叫佢樣衰衰咩，吾得人見人愛，哈哈！

雖然它很衰，但其實佢好好味架。由攪粉開始，已聞到佢香噴噴，齋聞已感覺到好味啦！

外表吾係最重要，最重要都係要有內涵啫。嘻嘻，自我檢麻醉。

伯爵茶戚風蛋糕

吾記得有幾耐冇做戚風蛋糕啦！有係時候練習吓啦！

今次做咩味道好呢？不如就做番我一個舊作「伯爵紅茶」啦！其實主要係想清埋d伯爵茶包（兩年前阿女從英國買返嚟）。

記得第一次做時，茶味吾夠濃，蛋糕質地亦吾夠彈。今次再重溫，覺得自己真係進步了不少（自我陶醉中）。

麵包布甸

眨吓眼又放完三日假期，聽日又要返工，襯今日仲有時間，就整番兩味甜品啦！

前日整完蛋撻，用淨左d蛋漿，但吾想再搓個撻皮，所以諗到呢個比較簡單嘅甜品。

其實我好少做蛋甜品，因我吾好。每次都係只做吾食。今次當然都吾例外啦！

蛋撻

吾記得上次整咩撻，本來只須做五個，但冇理由做幾個撻皮咁少啫，所以我就做定一打囉。

淨低嘅撻皮，我用牛油紙分格好，然後疊起一筒，再用保鮮袋PACK好放入冰箱，下次隨時想食都即刻焗得啦！超方便。

啱啱阿女開冰箱見到，提我才記得咋。於是我就拎佢出嚟，跟住打個蛋漿，就做左今晚嘅飯後甜品。

牛油蛋糕（少油版）

聽日要派街坊，我諗住二選一，一）燕麥曲奇，二）牛油蛋糕，因兩樣都好超易做，最後我都係揀左牛油蛋糕。

第一盤做左24粒原味，第二盤做左10粒朱古力味，因仔女鍾意朱古力囉。

今次我仲試吓減牛油，減左40%咁多添。平時我係用200g架，但今次只係用左120g咋，係咪睇個數字都覺得健康d啦？！嘻嘻。