傳統合桃酥

為了明天要重回地球（返工），所以今日我要盡最大努力，去完成假期最後一份工課。哈哈！

今日上網搜尋過關於合桃酥食譜，都找不到一個是我杯茶。原來坊間大部份食譜，都是只用了泡打粉和梳打粉，極少數會用上臭粉，大部份都不夠正宗。所以，我唯有靠自己再努力嘗試啦！

吾知大家有冇留意到，原來傳統合桃酥，除了是用臭粉外，仲係冇合桃架，即是合桃酥冇合桃，香蕉糕冇香蕉，菠蘿包冇菠蘿一樣道理。

所以今日我要做一個傳統做法，就係冇合桃的合桃酥啦！嘻嘻。

食後感：味道比上次香，質感好過上次，脆得嚟比較鬆。

爵士湯

記得第一次煲呢個湯，因為買吾到蜜瓜，所以轉左用哈蜜瓜，點知味道竟然出怪地好。啖湯基本係吾會飲到哈蜜瓜味，哈蜜瓜嘅味道好低調，但就可提升湯嘅鮮味，湯既清甜，仲好香，真係一試難忘。

今日行超市，見到有蜜瓜開箱（$31.90），所以就吾執書買番個。如果大家都想試吓，記住要揀個生d，皮要青，瓜按落要硬。吾好揀皮已變黃及淋身，因已太熟啦！

不過今次我吾係煲呀！今次係燉呀！因為我買左燉盅嗎！當然要用多d啦！平時好少出街飲湯，因為湯梗係要飲住家囉！不但真材實料，而且仲經濟好多添。

呢個燉湯如果出街飲，4人份要三四百蚊，依家自家燉8人份，都只不過二三百，平左又多左，吾洗教都識揀掛！燉湯仲要吾洗理，禁個制就可以有湯飲。

點樣令你屋企嘅男人（老公同阿仔）愛回家，除左識煮飯，煮餸，甜品，仲要靠啖靚湯架！

迷你合桃酥

吾知大家開左工未呢？我就仲未，所以要趁住仲有幾日，要好好珍惜啦（盡量做做做）。

今日我就做左一款嫁女餅>>> 合桃酥，亦係我最喜歡嫁女餅的第二位。大家估吓第一位係咩呢？。。。就係雞蛋糕啦！有冇餡都鍾意，不過就甜左D囉，所以奇華都好貼地，出左隻少甜版。

其實依家都好少機會真係食到嫁女嘅嫁女餅啦！因為身邊冇朋友嫁女，就算嫁女都冇派嫁女餅，哈哈。不過吾緊要，因為想食都好方便，隨時買得到（屋企同公司附近都有奇華）。

講真，自家製合桃酥一定吾會做到同街買嘅一模一樣，話會嘅都係呃你，哈哈。因街買嘅其實加左好多添加劑，如果你話可以做到一模一樣，咁就即係代表你都落左啦！所以自家製不須要追求百份百一樣，反而應該追求食得健康，添加劑當然可免則免吧！不過今次嘅合桃酥，臭粉是不可缺的，因合桃酥獨特嘅味道就係來自臭粉。但。。。其實。。。臭粉份量只得好少，1g都冇，一塊都只有0.04g咋，哈哈。

依家我就同大家分享吓，我嘅食後感啦！先講味道，甜度啱我，不太甜。轉用黑糖會比白糖香，而且顏色仲靚好多添。至於口感，就同街買嘅吾同，餅偏脆吾係鬆化，類似笑口棗口感，可能我冇加乳化劑關係，整體都有八成接近，與之前食譜比較，我對今次好滿意。

零失敗香蕉糕

估吾到新年後，第一樣做嘅竟然會係香蕉糕。因為吾想盒糕粉擺咁耐，所以用左呢個最快嘅方法，就係用嚟做香蕉糕啦！

其實都已經好耐冇做過啦！不過今次食譜係吾一樣嘅，有興趣可以去睇吓舊post［香蕉糕（須煮）］。今次材料主要係糕粉，不但免煮，而且仲零失敗添。今次味道同之前做嘅分別不大，但口感就比之前有彈性。不過製作就超簡單，超方便，整個過程都吾洗30分鐘就搞掂啦！

千層馬蹄糕（桂花/蔗汁/椰香） - 2018

仲以為可以已收爐，點知。。。哈哈！仲要嚟個複雜版添。呢個係非一般馬蹄糕，佢每層都係吾同味道架（如果你會每層搣嚟食）。

做埋呢個，真係正式封爐啦！哈哈。

瑤柱臘味芋頭糕 - 2018

最後衝刺啦！今年第一次出芋頭糕，係阿仔最愛，做左5底加2碗。另外，仲有7底蘿蔔糕，3底年糕，可以收爐啦！

好彩有水波爐幫手，一轉蒸到10底糕，蒸兩轉就搞掂晒啦！記得用明火蒸果時，真係蒸到人都癲呀！

瑤柱臘味蘿蔔糕 - 2018

最後一批蘿蔔糕，差不多有6斤蘿蔔絲，好大鑊，好難炒，下次最多4斤蘿蔔好啦！

今次用左新買嘅蘿蔔刨（7mm），粗度啱啱好，可以食到一條條蘿蔔，好正。

今年應該可以收爐啦！

紫薯椰汁年糕／南瓜椰汁年糕／紅豆椰汁年糕 - 2018

基本上，近幾年我都會每年試做新年糕，今年也不例外，仲係試到好盡添！不過呢批應該係最後一轉啦！

記得一個月之前，特別從雲南淘左古法紅糖和老冰糖返嚟，然後分別做左古法紅糖年糕及金莎奶黃年糕。直到最近我又好艱辛咁買到大糖同蔗糖，仲同阿女合作做左傳統古法年糕。上述四款糖，都係我今年第一次買，第一做，第一次食架，最意想不到係效果竟然出奇的好。

另外，仲有一款估估吓嘅班蘭椰汁年糕（吾知坊間有冇，不過我就冇search過），呢個年糕雖然係估估吓（當做實驗），但又真係估吾到竟然咁好味喎！哈哈。

除左試做幾款新年糕外，我仲學人拍片添，等粉絲們可以更深入了解（搓法）。不過我只係自篇自導但不自演，全部都要靠幕後黑手（阿女同工人姐姐）友情客串咋，哈哈。

今日，因為得我同姐姐兩個橕檯腳，所以求其簡單食個快飯，就即刻拿拿淋趕快去做糕啦！趁過年前仲有幾日，想做咩就要趁手啦！所以我今日一次做夠三款，哈哈。

下星期「糕」瘋會將會進入緊急狀態，到時就要專心做蘿蔔糕同芋頭糕，冇時間再研究新糕啦！

冰糖陳皮燉檸檬（禮盒裝）

話咁快又係時候燉檸檬啦（因為派晒同就嚟飲晒）！

近期新奇士檸檬價格仍然維持高位（$4個），但比上次size大左10%左右，咁就當佢平左啦！哈哈。

今次冰糖並吾係用太古原蔗冰糖（$12.X/250g），亦吾係街市買到果種袋裝冰糖（$7/600g），而係太古盒裝黃冰糖（$8.X/350g）。因姐姐買左檸檬，但又吾記要買冰糖，所以唯有臨急去左U Select買（屋企附近）。

今次份量比上次多，搞到燉盅放吾晒，唯有將一盒冰糖放入大碗，蓋上保鮮紙，然後將冰糖蒸溶（實驗成功），再倒入燉盅（其實有空間可注入液體），哈哈，咁又比我過到骨啦！咁就可以一次過燉晒，吾洗中途加冰糖啦！今次都係用電燉盅，都係燉左13個鐘，效果真係超正。

其實今次燉檸檬仲有另一個目的，因為今年有幾位親友健康都出現問題，所以我打算今年拜年吾再送糖果或自制花生酥/曲奇/鳥結糖等。因為我希望收到嘅親友，都可以食得更健康。

材料：
老陳皮　　　　1兩
新奇士檸檬　　1320g（12個）｛去兩端／白芯／核後｝
碎冰糖　　　　1400kg

其他：
食用梳打粉　　2茶匙
清水　　　　　適量
粗鹽　　　　　適量
已消毒玻璃瓶　2000ml

做法：

1. 清水加梳打粉拌溶，放入檸檬浸泡30分鐘（水要蓋過檸檬）。
2. 檸檬用清水洗淨，然後用粗鹽擦拭檸檬表面，再用清水洗淨。
3. 用廚紙抹乾檸檬水份，放架風乾一晚。
4. 陳皮浸泡至軟身，用刀仔刮乾淨果囊，然後清洗乾淨，用廚紙抹乾水份，放架風乾一晚。
5. 第二日，將檸檬切走兩端，然後切開一半，取走中間白芯。
6. 將檸檬切片及去核，陳皮切絲。
7. 將檸檬，陳皮，冰糖順次序放入燉盅內，然後隔水燉12小時（中途可拌勻一次）。
8. 完成後趁熱注入已消毒玻璃瓶內，蓋好立即將瓶反轉（製造真空狀態）， 整瓶完全冷卻後，反正及儲存陰涼處。

貼士：

• 如開封後，要放雪櫃儲存，而未開封的可儲存陰涼處3個月。
• 全部食材及器具都不能有一點水
• 陳皮越老，功效越好。
• 容器清洗乾淨後，用大火烚10分鐘消毒，然後抹乾及風乾。

步驟：冰糖陳皮檸檬

蘿蔔糕必備武器~蘿蔔刨

下面呢個神器，係早幾年睇電視見Gigi姐教整蘿蔔糕，而佢就係用緊呢個刨（出私伙拍節目），又講到呢個刨好好用，係佢去上海時買的，仲話跟左佢好多年添。

聽完佢講，我都吾執書，即刻淘左兩個返嚟（一個比奶奶）。自始以後，我就一直用呢個刨嚟刨蘿蔔絲做蘿蔔糕啦！其實神器除左刨蘿蔔絲外，平時都好有用架，例如刨土豆絲同芋絲。土豆絲我會用嚟炒肉絲，芋絲就會混入鯪魚膠內，然後煎鯪魚餅。

可能日子有功，神器係時候退役啦！因為釘已開始鬆脫，所以唯有重新買一個。今次我買左個大孔少少嘅神器，因為我想蘿蔔粗身少少，增加及豐富口感。

左：7mm（新）／右：5mm（舊）

想買嘅粉絲們，可以試吓去上海街睇吓，又或者學我淘寶買，但最緊要睇番時間趕吾趕得切新年前到喎（刨絲器）。