低溫慢煮叉燒（惠而浦4S）

為左呢舊叉燒，真係落足本架。因之前部抽真空機抽吾到濕材料，所以唯有用密實袋。但密實袋始終抽得冇咁好，所以唯有轉做慢烤。但慢烤要睇實冇得行開，所以搞到好困身。

直至最近買左4S，可以長蒸三小時吾洗加水關係，所以又搞到我心郁郁，想買過部好d嘅抽真空機啦！

講真，雖然慢烤同慢煮效果都一樣咁好，但慢煮可以吾洗睇，由得4S自己搞3個鐘，真係爽好多。以後有4S同真空機，就可以做多D慢煮叉燒啦！

材料：

豬腩肉　1 Kg

生粉　　8湯匙

水　　　少許

醃料：

砂糖　　5湯匙

幼鹽　　1/3湯匙 

雞粉　　1/2湯匙

海鮮醬　2湯匙

蠔油　　2湯匙

芝麻醬　1/2湯匙

生抽　　1/2茶匙

老抽　　1/2茶匙

紹興酒　1/2湯匙

乾葱茸　1/2湯匙

蒜茸　　1茶匙

雞蛋　　1隻

掃面：

百花蜜　1/2碗

做法：

1. 豬腩肉切走皮不要，然後切出帶骨一層肉（做其他餸菜），然後洗乾淨，加4湯匙生粉撈勻（可加少許水，杰粉漿狀態），醃4小時（放入保鮮盒存雪櫃）。
2. 4小時後，取出洗乾淨，加4湯匙生粉撈勻（可加少許水，杰粉漿狀態）。
3. 將全部醃料拌勻，然後將（2）放入醃料內撈勻，放入保鮮盒，存入雪櫃醃兩小時。
4. 取出腩肉（汁留用），放入真空袋，抽真空及封口。
5. 放入深盤，注入75度水（蓋過叉燒），放入4S，75度蒸氣3小時。
6. 完成後，剪開真空袋，倒走汁液，將肉從袋中取出，放上焗盤（焗盤先鋪錫紙，再放上牛油紙）。
7. 掃上醃汁，放入已預熱230度焗爐，焗15分鐘，反轉再掃上醃汁焗15分鐘。
8. 取出掃上蜜糖，230度焗5分鐘，反轉再掃蜜糖焗5分鐘。

泰國冰鮮豬腩肉（惠康買）

濕抽，由開始至完成1分鐘。

真空後，浸入75度水中。

75度蒸氣3小時

完成後，剪開真空袋，倒走汁液，將肉從袋中取出，放上焗盤（焗盤先鋪錫紙，再放上牛油紙）。將叉燒掃上醃汁，放入已預熱230度焗爐，焗15分鐘，反轉再掃上醃汁焗15分鐘。取出掃上蜜糖焗5分鐘，反轉再掃蜜糖焗5分鐘。