今日去超市買左兩袋日本蕃薯，$45／2袋，1袋紫心蕃薯有兩條，黃心蕃薯有4粒。計吓數，原來1條紫心要成$11呀！其實都幾貴，所以今日食一半好啦！留番一半聽日食。本來諗住烚嚟食，但最後竟然轉左煨，哈哈。
對上一次煨蕃薯，究竟係幾時呢？我諗都有5年啦！我仲記得上次煨嘅係印尼蜜糖蕃薯，甜到不得了，我就吾太鍾意，但老公就超like，嘻嘻。
出街買一舊煨蕃薯，起碼要廿蚊，自己焗真係平好多。雖然焗爐焗爭左炭燒味，但都已經好吾錯啦！
黃肉煨到離晒皮，個心吾知點解會白白地，但其實係熟。
紫肉同黃肉都好甜（濃味），但質感卻吾一樣，我比較鍾意紫肉。
材料：
日本蕃薯 1袋（長2條／細4條）
片糖 2-3片
做法：
- 蕃薯洗淨，片糖加水（夠蓋過蕃薯），煮滾後放入蕃薯，烚20分鐘。
- 將蕃薯取出印乾（糖水留用），放在已鋪牛油紙焗盤上（不要用錫紙，因會癡住）。
- 放入已預熱240度焗爐，焗約45分鐘（每15分鐘取出掃一次片糖水）。＊最後5分鐘我轉用燒烤模式（水波爐）＊
蕃薯印乾，放在已鋪牛油紙焗盤上。
糖水留用
每15分鐘掃一次片糖水
