本來想做抹茶雪芳蛋糕，但最終都係改變主意，試左個新食譜，蜂蜜+抹茶=蜂蜜抹茶蛋糕。
最近愛上燙麵+水浴做法，所以今次都吾例外。因為今次多左粉，又少左奶，所以撈粉嘅時候會比較乾同杰。不過其實都吾緊要，因為吾影響蛋糕成品的。由於第一次用鬆餅模試水浴，所以時間未能掌握準確，引致蛋糕面出現裂痕。有左今次嘅經驗，下次我就懂得時間控制啦！
今次用左元氣抹茶粉，估吾到都做到色、香、味俱全。另外，之前有粉絲問我，菜油需要加熱至幾度先啱，所以今次我特別量度吓溫度，結果係90度（微波爐30秒+20秒），但每個人爐溫不同，最好都係用溫度計測試。
可能倒蛋糕糊入模時提得不夠高，所以比上次多左氣泡。
材料：（9個）
蛋黃 4隻
低筋粉 70g
抹茶粉 10-15g
粟粉 10g
菜油 30g
蜂蜜 60g
牛奶 50g
蛋白 4隻
砂糖 50g
粟粉 1茶匙
鹽 少撮
做法：
- 將菜油叮30秒，拌勻再叮20秒（約90度），然後將油倒入已篩低筋粉內，快手拌勻成熟粉。
- 牛奶叮30秒，加入蜂蜜拌溶。將蜂蜜牛奶分3次加入（1）拌勻，然後逐一加入蛋黃拌勻。
- 蛋白加鹽，用打蛋器低速打散，然後轉高速打至大泡沫，將糖分5次加入打至濕性泡沫（提起打蛋棒有長尾巴向下），再轉低速打多一分鐘至光滑。
- 將蛋白霜分3次加入麵糊內拌勻，然後從高處將蛋糕糊倒入蛋糕紙杯內。
- 蛋糕模在檯面敲兩下，然後放入深焗盤內，再注入室溫水（水喉水）至蛋糕模1/3高度。
- 放入已預熱160度焗爐（下層），焗15分鐘，加一個焗盤在上層（擋火），然後繼續焗15分鐘或至熟。＊小心留意蛋糕表面，自行加減時間及溫度。＊
