最近有位朋友跟我的食譜試做鳳梨酥，竟然得到家人大激讚，最令佢驚喜係.....囡囡一口氣食左兩個。因為佢囡囡平時係吾吼台灣鳳梨酥架，今次竟然仲連食兩個添。食完仲要有讚，話好食過台灣果D多多聲。搞到我朋友（佢媽媽）超有成功感，超開心呢！聽到朋友咁講，連我都開心埋一份，因為我更有成功感。講開又講，其實我都好耐冇整啦！原來對上一次已經係8個月前啦！
早幾日中秋補假，去左fusion（百佳姊妹超市）逛逛，無意中見到佢地有地們金菠蘿，嘩！仲係超巨型呀。呀。呀。呀！未見過咁大個菠蘿架！一個有成2KG以上呀！都係只賣$23.9，咁抵冇理由吾買啫，吾執書嘅我，仲要買夠兩個添（可能個天都想我整鳳梨酥）。就係咁，就抬左兩個返屋企啦！好似拎住成包米咁重，仲要吾就手，好鬼死吉喎，拎死人啦！
等左兩日，見個菠蘿都熟得七七八八，就郁手整個鳳梨餡先啦！去完皮刨完絲後再磅吓，嘩！得番一半重量咋，仲隔出成公升汁，超甜呀！要加冰沖淡至飲得呢！都係第一次買到咁正嘅菠蘿，第日吾知仲買吾買到呢！
用具：
鳳梨酥模 20個（40g）
餅皮材料（20粒@22g）：
無鹽牛油（室溫） 130g
糖粉 40g
鹽 少撮
雞蛋 40g
中筋粉 50g
低筋粉 150g
杏仁粉 25g
奶粉 20g
做法：
- 取出鳳梨酥餡，平均分割約15g粒，搓圓存雪櫃備用。
- 牛油加糖粉打至幼滑，然後逐少加入蛋打勻。
- 篩入低筋粉，加入杏仁粉及奶粉拌至光滑麵糰，存入雪櫃冷凍20-30分鐘（不黏手）。
- 取出麵團，平均分割約20-22g／粒，滾圓。
- 將麵團包入鳳梨餡，收口向下，放入模內小心按平。
- 預熱焗爐180度，焗約12分鐘或至金黃色，然後反轉再焗約12分鐘至金黃色即可。
- 出爐後，將鳳梨酥連模放上架，立即脫模，放涼一晚後才可包裝。
鳳梨餡材料（20粒＠15g）：
地們金菠蘿肉 500g砂糖 50g
麥芽糖 50g（可添加）
做法：
- 將菠蘿去皮，去芯，然後刨／切絲，隔出汁液。
- 菠蘿加糖放入易潔鑊，以中細火炒至乾身（約30-40分鐘），然後加入麥芽糖炒勻（試味添加），繼續再炒至收汁及乾身。
- 將餡放入保鮮盒，餡面緊貼保鮮紙，待放涼後存雪櫃雪一晚以上。
貼士：
- 菠蘿芯都可以一齊刨絲，但我不喜歡芯較多渣，所以不要。
- 可淨用麥芽糖，不加砂糖。
- 可一次做定大份鳳梨餡，將會用嘅放普通格，稍後用囓用保鮮紙包好，再放保鮮盒，然後存冰箱，用之前早一日放回普通格回溫即可使用。
- 想知道餡是否夠乾？只要在未炒之前磅一磅先，然後到炒到差不多時再磅一次，如重量是未炒前一半就差不多啦！記住要計埋糖嘅重量喎。
- 如何知道模容量？只要將餅放入模內9成滿，然後量吓重量，就即是模容量啦！我不會做到十成滿，因要留空間澎漲（餡受熱時會發大）。
- 餅皮：餡比例並無限制，喜歡皮多或餡多任由配搭，一般會是7:3／6:4。
- 麵糰要跟模一齊焗，否則會走樣。如模具不夠，唯有分幾輪做。
認住呢張牌
教埋你點開菠蘿
第一個重2174g
第二個重2378g
我呢度做左兩份餡
去完皮，刨完絲後，得番1115g咋
菠蘿肉加砂糖炒
開始收汁啦
加入麥芽糖再炒至收乾汁
完成後得番620g
放入保鮮盒
緊貼上保鮮紙
雪一晚後，分割15g/粒。
餅皮係阿女幫我搓㗎，
佢嘅第一次，算吾錯掛？！
仲幫手滾圓添
鳳梨酥模具
小心壓模
