話咁快，仲有一個月又過年啦！希望疫情盡快消失，大家可以從回正常生活。
雖然仲有一個月先過年，但阿女已急不及待，日日吹住我整蘿蔔糕同芋頭糕啦！佢話吾想過年時食糕，要在過年前食喎，究竟呢個係咩玩法！？
今年最特別係，阿女竟然為我準備埋臘腸呀！好啦！既然佢咁想食，就早Ｄ整比佢食啦！今日先嚟整個蘿蔔糕，下星期先整芋頭糕啦！
今年想轉吓新口味。所以食譜內加入左蝦米（希望香Ｄ），同埋改左少少調味（希望顏色白Ｄ）。
出爐啦！等我即刻試吓味先，味道比往年嘅嚟得簡單和清淡，又是另一種食法。雖然蘿蔔份量比以往少了一半，但出嚟又吾多覺（少）喎。
OK，呢個味道我都幾滿意，可以再encore。
材料：
白蘿蔔條 800g
臘腸 3-4條（120-160g）
瑤柱 25g
蝦米 25g
粘米粉 150g
馬蹄粉 30g
水 280g（包括浸蝦米、瑤柱水）
乾蔥茸 1粒
調味：
糖 18g
鹽 6g
雞粉 12g
胡椒粉 2g
油 2湯匙
麻油 8g
做法：
- 瑤柱及蝦米分別洗淨及浸水（過面）
- 臘腸用熱水浸洗表面灰塵，然後沖洗乾淨。
- 瑤柱（連浸水）及臘腸蒸15分鐘，然後放涼。
- 將瑤柱撕成絲，臘腸切細粒，蝦米切細粒至碎，備用。
- 蘿蔔洗淨去皮切／刨粗絲，然後蒸15分鐘（透明，約8成熟）。
- 粘米粉，馬蹄粉加水拌勻至冇粉粒，過濾一次(去除雜質)。
- 然後加入全部調味料拌勻成粉漿，備用。
- 燒熱油鑊，爆香臘腸，然後加入乾蔥炒勻，再加入瑤柱及蝦米炒至焦香，盛起備用。
- 趁熱加入剛蒸好蘿蔔條連水炒勻，熄火，加入粉漿拌勻，再加入2/3臘味拌勻。
- 倒入模，大火隔水蒸一小時至熟。
- 出爐後，鋪上臘味（輕輕向下壓實）裝飾即可。
貼士:
1. 臘味切細至碎粒，可分佈得更平均，而切時更不易散脫。
2. 溝馬蹄粉可令糕較挺身及滑口
3. 蘿蔔切／刨成約筷子粗條，會令糕更有咬口。
4. 臘味炒得夠焦香，蒸出嚟會更出味。
5. 糕嘅味道主要來自臘味，所以一定要揀靚臘味。
6. 蘿蔔不可蒸熟／太淋
