牛奶饅頭

今晚做左快靚正中或包，冇落牛奶，只落清水。冇落油，只落糖。8分鐘完成麵團，醒麵再加發酵用左左45分鐘。加埋蒸15分鐘，加加埋埋，都係用左一個鐘多d，真係快過焗包好多呀！

另外，之前有紅豆餡未食晒，所以捲左少少落饅頭，不過樣衰衰，佢不願出鏡。

紫薯瑞士卷

阿女同朋友去左澳門玩兩日，我就留響屋企玩兩日。尋日整左梅菜扣肉同紅豆餡，今日就整左大福同呢個紫薯瑞士卷。

話說上星期日，同阿女食完元氣壽司，跟住經過東海堂，佢拉住我入去，話想食紫薯竹灰蛋糕（優惠$80條），睇睇吓又話冇乜特別，都係吾食。

之後，我話自己整都得啦！買斤蕃薯加埋蛋糕材料都只不過係十幾蚊，足真材實料添。

我做人講口齒架，話左做就做。好，開工啦！

紅豆大福

對上一次做大福已是2012年嘅事啦！真係好耐好耐之前呀！

印象中做法同包法都好似好麻煩，所以驚驚冇再做啦！但今次麵團一d都吾難控制，吾知係咪呢幾年已升左呢，所以吾覺難？嘻嘻！

講真，今次真係好易包，又吾癡手，凍左都包到。新手都難吾到架。

今次點解會再做番？主要原因係因為屋企有自家製紅豆餡。我覺得用紅豆餡嚟做大福係最好味，而且仲係超夾添。

今日係我第一次用homemade紅豆餡做大福，真係好正，不但餡料新鮮，而且糯米皮軟糯適中，好好味呀！不過可惜冇士多啤梨囉！

少甜版紅豆餡

今日再用麵包機煮紅豆餡，今日再減糖，只係用左2/3糖咋。

買部新麵包機時，都冇諗過原來可以做得咁好食。我好鍾意包機做嘅紅豆餡，比起做果醬更好味。呢個味道好清新，又天然，最重要係零油添。

梅菜扣肉

老公每次吃完梅菜扣肉，都會好多批評，會叫我跟街煮法，如刺孔，炸，炆。。。。等等。總之就要求多多，好吾健康。

不過我間中都會順下佢意嘅，鬼叫佢係我老細咩！受人二分四，冇計啦！

當我照跟指示煮完後，亦當佢食完後，佢會比嘅評語係 “OK啦！差吾多啦！”

聽到呢度，我當堂辣著左啦！如果只係OK，真係差吾多，我就吾洗做咁多功夫，吾洗嘥咁多時間，最緊要係嘥晒我一番心機囉！嗚嗚嗚！

我當然有還拖啦！同佢講，如果真係只係OK，真係差吾多，我就一切照舊，做番簡單煮法啦！佢即時改口話，梗係吾係啦！梗係好過平時啦！梗係。。。。。

講到呢到，我就諗起有句話「早知今日，何必當初呢？」。d男人就係咁衰啦！有果時又吾珍惜，到冇至嚟後悔。哈，老娘吾發火，當我病貓。啍！！！

今日又等我嚟滿足吓佢個胃啦！今次我改良過「冇咁罪惡版」，用焗代替炸。

＊後記：老貓燒鬚，原來用碟遮住蒸傳熱慢，所以肉蒸吾夠淋。好彩未夠鐘開飯，可以比我補飛，嚟得切用智能煲再煮佢15分鐘，搞掂啦。

白汁忌廉雞皇煙斗粉

今晚又輪到我要煮飯啦！繼上星期嘅卡幫尼意粉後，今次再推出另一款口味「白汁忌廉雞皇煙斗粉」。

今次嘅醬汁冇卡幫尼咁漏，煙斗粉亦冇扁意粉咁濟。可能今次我加左大量蘑菇同粟米，所以成碟野都變得清爽晒。

封口機+封口袋

買呢部封口機，係為左包裝鳳梨酥用，因為我著重包裝/外表，正所謂人靠衣裝，物靠金裝嗎！

為左令整件事配合得更完美，無論係模具，封口貼或包裝袋，我都是精心挑選過。

俗語有話：「工欲善其事，必先利其器。」所以我就買左呢部巨型封口機啦（我覺得好大部，考慮左好耐）！

之前封鳳梨酥袋，封得好靚，但其他袋就封吾到，因會溶。後嚟知道原來並吾係任何袋都封得，所以最近淘左兩款啱用嘅袋試吓。

今日就試左封Brownies，好OK呀！冇溶到，仲封得好密實添。正！

朱古力布朗尼 Chocolate Brownie

復活節甜品，又點少得主角朱古力呢！不過我吾係整朱古力復活蛋，而係整朱古力蛋糕。今次買左隻新牌子黑朱古力（Weiss 72%），吾知味道好吾好呢！

德國咸豬手

今晚焗番隻德國咸豬手慶祝吓復活節至得

水波爐一周年回顧

時間過得好快，眨吓眼部水波爐又幫左我一年啦！

記得當初未買佢之前，的確考慮左好耐，因為價錢好甘吓。最後，雖然克服了金錢上嘅問題，但又到擺位問題出現啦！由於波仔實在太威猛，身型龐大，真係好難搵到容身之所呢！

考慮、研究、諗計、再三思，終於。。。哈哈！波仔赢左啦！

我地由初初相識，就好似拍拖一樣，大家每日都在談戀愛（溝通和了解），我會錫住佢（就住用），慢慢培養感情。經過時間嘅洗滌，波仔已成為我的好伴侶，而且仲任勞任怨，言聽計從，哈哈。我終於可以控制到佢啦！

現在米米家無論事務大小，都會有佢份，由佢「煮」理，絕對係我的好伴侶，冇得輸。自從波仔成功入宅，焗爐、蒸籠、微波爐，通通都冇地企，全部輸晒（我已同佢地分左手好耐啦）。

希望未來的兩年（因為續保左2年），波仔仍然聽聽話話，留響我身邊，我地繼續Sweet Sweet啦！

巨型厚切餐肉包

今晚一枝公，食完晚飯冇野做，要諗辦法嚟打發吓時間。我揀左嚟整麵包，係巨型厚切餐肉包，仲有牛油卷。

好耐冇整啦！亦好耐冇食啦！因冇買包好耐。諗起以前細個時住中環，每日返學都會經過泰昌（未成名），然後買個包做早餐，其中一款就係餐肉包啦！想起都好回味，又係童年回憶囉！哈哈。但現在嘅泰昌已今非昔比了。

九層糕

今日我做嘅係五層糕『低層版』，因為個模細，所以做吾到九層糕『高層版』。

前一排行過鵝頸橋（近燈籠街口），見到有間糕點鋪，於是就買左幾件白糖糕（因我仲未做得似樣），我吾係因為佢d糕好食，只係想回憶吓童年味道啫（間中都會想食）。

間鋪仲有好多款糕點，有芝麻卷、馬蹄卷、糯米糍及缽仔糕等。不過依家好多糕自己都識得做，仲整得好味過佢，所以吾會再比錢去買啦！見佢地有一款黃黃地色嘅千層糕，之前有同事請我食過，其實並無特別，只得甜甜地，煙煙韌韌。

由於我係用波仔嚟蒸，真係好嘥時間，明火應該會快好多，不過一次就蒸得好少。可能矽膠模傳熱慢，第一層蒸左十幾分鐘至凝固，然後每層蒸十分鐘，到最後一層仲要加多15分鐘，足足玩左成個幾鐘呀！仲未收得工架，因為仲要等佢攤凍，脫模，影相，包裝，仲有出Post呢！

搞到12點幾，終於完成晒啦！好攰呀！可以瞓得覺lu。

雙色燕麥曲奇

今晚放工返到屋企，立即開行Turbo，拿拿淋製作「燕麥曲奇」。事關尋日阿女已落order，但我忙住焗叉燒同蛋糕，根本仲邊有時間嚟招呼佢呢！嗚！嗚！嗚！我都吾想架。所以襯佢放學未返到嚟之前，要趕起貨囉（補飛），希望可以比個surprise佢。

好彩可以順利及時完成，在阿女踏入門口前，已全部出爐，放晒烤架唞涼啦（滴汗中）！

今次除左做阿女至愛嘅「原味燕麥曲奇」外，仲加多款新口味「士多啤梨燕麥曲奇」添。

士多啤梨芝士蛋糕（焗）

最近見D士多啤梨平左好多，仲有特價添，所以買左兩盒，一盒就咁食，一盒就用嚟整蛋糕。

尋日行材料店，見有隻士多啤梨乾碎，見幾得意，所以買左包嚟試吓。

雪櫃仲有忌廉芝士，已開左一個幾月，不過我包得好好，見仲未發毛，就用嚟整紐約芝士餅。

哈哈，屋企仲有幾塊麥維他消化餅，咁就齊晒料開工啦！

食後感：一D都吾漏，士多啤梨乾碎少少酸酸地，味吾濃，可能加得少掛。個cake由面至底都咁好味，而且仲好清新添。

蜜汁叉燒

「叉燒」，相信冇人吾鍾意掛，連外國朋友都超like，應該算係燒味中的No. 1。

今日我又嚟整叉燒啦！其實自家製不等於平，要花好多心機和時間，計計埋埋仲貴過街買。

今次用左冰鮮梅頭肉，都係第一次咋！冰鮮豬肉並不是平好多，只係路過見幾好樣，咪買兩包試吓囉，哈哈！

醃料同以往一樣，只係多左一個步驟，就係完成後浸麥芽糖水，點解？咪又係屋企位少爺仔要我試囉，佢話網上教浸住麥芽糖水肉會淋d喎！嘻嘻，都吾知堅定流，不過試吓都冇壞嘅，咪當做吓實驗囉。

如果大家想學，記住買肥梅頭，叫豬肉佬切舊靚仔d比你，講明做叉燒。然後預早一晚醃定，醃過夜等佢可以入味d，等日中午就可以焗啦！

卡幫尼虎蝦扁意粉

今日姐姐放假，本來打算煮飯，簡單烚個菜，蒸個肉，再加d料搞掂。點知竟然被阿仔話“咁普通”？！心諗，如果佢要返工，我吾煮添啦！

比佢搞到我又要諗食乜（其實尋日已買定晒餸）。於是我問佢，吾食飯食意粉好母？兩秒吾洗，佢即答“好”，話好過又食飯喎！仲點名要我整「卡幫尼意粉」，然後話好易啫，好簡單啫。

於是我又要上網搵，睇吓片，然後再重組吓各人優點，最後就做左呢個米米版卡幫尼啦！原來真係吾難，真係非常簡單，只要買齊材料，就話咁易啦！

不過呢款意粉吾可以預早做定，一定要即煮即食，遲d都吾得架，因攤凍醬汁就會變得好杰好乾啦！

另外，因為呢款意粉冇乜餸，所以就加重料，等大家可以食得豐富d。

燕麥雜錦包

今晚玩麵包，仲要玩夠三款添。哈哈！

燕麥圈、巨型芝士腸卷、燕麥巨型芝士卷。

有點巨型？每個麵團有100g，你話夠吾夠巨型呢？

夾餅（改良版）

今晚再試新食譜，今次不但賣相好，效果同味道都一樣好。

阿女仲話下次要跟番呢個食譜照做，不過吾好係聽日，因為怕再食會肥死😂。

夾餅（雞蛋仔版）

今日就讓我同大家分享吓，嚟個集體回憶啦！

香港懷舊小食 -「夾餅」，相信係好多香港人嘅童年回憶，而生於香港長於外地嘅朋友，一定更懷念這種味道。

雖然我並未做到與童年時所食到嘅十足十味道，但外觀和風味上也算做到70分，應該都可以呃得吓人，暫時止住渴先啦！希望下次會做得更好。

今次為了滿足外地粉絲朋友們嘅要求，專誠做了一個味道好，又香，又脆，但口感有待改善嘅 homemade 版夾餅，大家都可試吓做啦！

香蕉糕

再試香蕉糕，今次加重香蕉味，比上次做得更好。

特濃朱古力瑞士卷

呢個食譜搞左好耐，9點9搞到依家，足足打左幾次，都吾知點解post吾到，激死人。

今次比較詳細介紹步驟，看圖都應該識做啦掛！

藍莓牛油蛋糕

之前去Citysuper shopping，經過富澤見到有隻藍莓粒，話可以整蛋糕，又可以整麵包，好似幾得意，所以買左包試吓。

襯今日有時間，就用嚟試吓整牛油蛋糕啦！食落都幾得意，有d似藍莓果醬（溶溶地），下次可以再試吓用嚟整芝士蛋糕都好喎。

黃金豆沙包

P仔1001做紅豆餡的確吾錯，最正係一滴油都冇，比起傳統豆沙做法，真係食得健康好多。而另一個8分鐘麵團模式，做中式包麵團快靚正，快到轉個頭就搞掂。

好多時大家蒸中式包時都會鄒皮，凹陷，其實原因會有好多可能性。雖然我吾係專家，但都可分享吓個人心得。原因有一，倒汗水滴落包面。二，溫度急降（蒸好即開蓋）。三，過度發酵。

青蘋果慕士朱古力脆脆蛋糕

足本生日蛋糕

今年為阿女親手做左個生日蛋糕，賀佢21歲牛一。往年我會去東海堂買，但今年見款吾多，又冇特別吸引，重點推介都係日本士多啤梨，賣3百幾蚊一個。心諗，咁簡單自己都做到啦！

好，就自己動動手啦！橫掂屋企有晒材料，買盒日本士多啤梨，再買多兩包朱古力手指餅，就可以開工啦！

葡式蛋撻（懶人版）

以前想食傳統葡撻，要過澳門至食到。後嚟香港KFC有得食，味道都吾錯，但就甜左d。依家終於可以由我話事，鍾意點都得。不過當然冇人地做到個酥皮咁酥脆正宗啦！但以家庭式嚟比，都算呃得吓人掛，睇到都以為買呀！嘻嘻。講真，其實無論賣相、味道和整體感覺，像真度已做到80分啦！

吉士忌廉泡芙

好耐冇做泡芙，又係時候要練習吓啦！點知.....衰左，太失敗了，嗚。嗚。嗚。點解會扁晒架。

我一向都吾會咁快認輸，吾會咁易放棄，除非再做都失敗啦！應該吾會咁黑仔掛。好啦！即刻再嚟過，哈哈，阿媽，我得左啦！我終於都成功啦！

*死因經研究後，應該係高溫轉低溫出事。於是第二次焗時，我冇再轉低溫，只係加個焗盤放上層遮住泡芙面繼續焗，嘩！掂晒！

杏仁曲奇

今年過年，打算做曲奇送禮，等我做吓實習先啦！

紅豆餡

繼續試新模式【紅豆餡】，有左佢就可以變出多款紅豆甜品啦！Coming soon.........

估吾到麵包機出品都可以咁好食，仲好fresh添，勁like呀！

材料：

乾紅豆 150g

糖 140g

做法：

1. 紅豆浸一晚，加水煲淋。
2. 將煮好紅豆隔水，滴乾備用。
3. 麵包機放入麵包葉片，加入糖，再加入水煮紅豆。
4. 麵包機選紅豆餡模式
5. 完成後，倒入保鮮盒，放涼後存雪櫃備用。

網誌正式啟動日

話說在建立Facebook粉絲專頁之前，其實我係諗住開個Blog。但當我建立了Blog之後，就被它的內容文字嚇退了。最後，在無助之下，唯有選擇了「面書」的懷抱。

直至今日【2016年3月3日】，我終於的起心肝同勇氣，正式編寫我的私家《Blog》。網誌內容會與專頁差不多，點解我仲要開多個？因為發現舊貼文經常會不翼而飛，而且Fb搜尋舊貼文也比較麻煩，要碌來碌去，碌上碌落。但Blog就簡單方便得多，只要揀啱分類，就可容易搜尋得到。由於網誌今天才開始，所以須要比d時間我，我會慢慢補回舊貼文來豐富網誌內容。

 *3月3日前貼文，都是我的舊作。*

甜麵糰

材料：
高筋粉　300g
奶粉　　8g
糖　　　40g
鹽　　　3g
牛油　　20g
蛋液　　20g
水　　　170g
酵母　　5g

做法：

1. 麵包機製作麵糰，完成後取出麵糰，平均分割等份，排氣，滾圓，醒麵15分鐘。
2. 包餡（如有），造形，放上焗盤（每個隔開一個包位），進行第二次發酵至兩倍大（約45分鐘）。
3. 放入已預熱180°C焗爐，焗15分鐘。

咸麵團

材料：

高筋粉　300g
奶粉　　8g
糖　　　15g
鹽　　　5g
牛油　　15g
水　　　180g
酵母　　4g

做法：

1. 麵包機製作麵團，完成後取出麵團，平均分割等份，排氣，滾圓，醒麵15分鐘。
2. 包餡(如有)，造形，放上焗盤（每個隔開一個包位），進行第二次發酵至兩倍大（約45分鐘）。
3. 放入已預熱180°C焗爐，焗15分鐘。

朱古力慕士蛋糕

今日行材料店，見到有隻焦糖朱古力粒，見咁平（平過黑朱古力），而老闆又推介，咁咪買包試吓囉。

平時做朱古力甜品都會習慣加Baileys酒（因為會香Ｄ），今次都吾例外。

涼拌貓耳朵

一個非常簡單嘅前菜／冷盤，雖然並不是名貴菜色，沒有高級食材，但它卻非常可口美味，一年四季都啱食，重點係食極都吾肥，嘻嘻！

材料：
貓耳朵（已浸洗）1飯碗
蒜蓉4粒
糖2茶匙
陳醋2湯匙
生抽2茶匙
鹽1/2茶匙
雞粉1/2茶匙
麻油1茶匙
胡椒粉1/4茶匙

做法：

1. 貓耳朵浸軟，烚1分鐘。
2. 隔走水份，浸冰水1分鐘。
3. 瀝乾水份及揸乾水。
4. 將全部調味料混合，加入貓耳朵拌勻，存入雪櫃兩小時以上或過夜，即可食用。

＊如喜歡青芥末，可加入1-2湯匙。

土匪雞翼

每次去譚仔，除了吃米線外，有冇試過佢地出名嘅土匪雞翼呢？好就好食，不過要成廿蚊一碟，仲係得三隻添（有ｄ貴），真係吾夠喉。

依家屋企都可以整到啦！廿蚊已經有十幾隻啦！以後仲洗乜再出街食。