基本上，近幾年我都會每年試做新年糕，今年也不例外，仲係試到好盡添！不過呢批應該係最後一轉啦！
記得一個月之前，特別從雲南淘左古法紅糖和老冰糖返嚟，然後分別做左古法紅糖年糕及金莎奶黃年糕。直到最近我又好艱辛咁買到大糖同蔗糖，仲同阿女合作做左傳統古法年糕。上述四款糖，都係我今年第一次買，第一做，第一次食架，最意想不到係效果竟然出奇的好。
另外，仲有一款估估吓嘅班蘭椰汁年糕（吾知坊間有冇，不過我就冇search過），呢個年糕雖然係估估吓（當做實驗），但又真係估吾到竟然咁好味喎！哈哈。
除左試做幾款新年糕外，我仲學人拍片添，等粉絲們可以更深入了解（搓法）。不過我只係自篇自導但不自演，全部都要靠幕後黑手（阿女同工人姐姐）友情客串咋，哈哈。
今日，因為得我同姐姐兩個橕檯腳，所以求其簡單食個快飯，就即刻拿拿淋趕快去做糕啦！趁過年前仲有幾日，想做咩就要趁手啦！所以我今日一次做夠三款，哈哈。
下星期「糕」瘋會將會進入緊急狀態，到時就要專心做蘿蔔糕同芋頭糕，冇時間再研究新糕啦！
材料：（2盒）
紫心蕃薯蓉 120g
南瓜蓉 120g
紅豆蓉 120g
糯米粉 560g
澄麵 80g
椰漿 560g
清水 150g
砂糖 450g
鹽 少撮
水（後備） 80g
做法：
- 蕃薯／南瓜蒸淋及壓蓉備用。紅豆煮淋，然後加少許糖再煮一陣（因紫薯／南瓜都有甜味，而紅豆本體就冇甜味），隔水壓蓉備用。
- 將糖，水，椰漿及鹽放入鍋內，中細火煮溶（不須滾），然後放涼。
- 糯米粉及澄麵混合，倒入已放涼糖水，拌勻，過濾2次至冇粉粒。
- 將粉漿平分3份，每份分別加入紫薯，南瓜或紅豆蓉，拌勻。
- 將20-30g後備水逐少加入紫薯蓉內拌勻，20-30g後備水逐少加入紅豆蓉內拌勻，10-20g後備水逐少加入南瓜蓉內拌勻。（未必須要加晒後備水，要視乎紫薯／南瓜／紅豆濕度，開漿時須自己感覺和目測）
- 然後入模至8/9成滿，大火隔水蒸45分鐘或至熟。
全部材料
紅豆蓉
紫薯蓉
南瓜蓉（比紅豆／紫薯較濕）
左：南瓜，中：紅豆，右：紫薯
出爐啦！
