話咁快又放完三日假期，聽日又係返工日啦！不過，我仲未洗返住，因為我仲有幾日大假。
豬年第一爐焗左轉叉燒，今日第二爐就焗左花生酥，估吾到兩爐都係為左外送。
話說阿女最近轉左新工，而新公司文化係逗利是要回禮（糖果），所以阿女就諗住拎兩包糖果返去。
其實新年食左咁多糖果，加上人人都係派糖果，我為左可以特別D，吾想咁行貨，所以我提議派自家製花生酥囉，係咪攞苦嚟辛呢？哈哈。
準備就緒
材料：（50粒14g）
鹽焗花生（打成粉） 220g
中筋粉 220g
糖粉 135g
米糠油 120-140g
餅面：
已烘杏仁 50粒
蛋黃 2個
＊如買生花生，要先烘焗（180度10分鐘），然後去花生衣。另外，麵糰須加入1/4茶匙幼鹽。
做法：
- 全部乾料放入容器內拌勻，然後加入110g油攪勻，如太散不能成糰，可加多10-20g油，拌勻成糰。
- 將麵糰平均分割每粒14g，滾圓，然後放在已鋪牛油紙焗盤上。
- 在餅面放上杏仁，再輕輕向下壓入。
- 餅面掃上蛋液，來回掃兩次。
- 放入已預熱160°C焗爐，焗18-20分鐘至金黃色，出爐後放上烤架放涼，待完全放涼後才可包裝或存密實盒。。
