「米」豬年 - 百子千孫【鮮椰汁年糕】- 2019

「椰子」寓意有爺有子，家庭幸福美滿，所以過年又點少得椰子呢！

是咁的，今日路過馬寶道，見到平時買開香料間鋪頭，門口貼左早幾日東張西望介紹嘅剪片，近門口仲放左好多糕響度，於是咪走入去八下囉。

雖然鋪內人吾多（仲有路行），不過原來年糕已全部沽清，而見到嘅糕只係等訂左嘅客人嚟攞咋。現場所見，只得椰汁馬豆糕可買，年糕就要訂先有，不過要初三先攞到。老闆話，佢地經電視介紹完，年糕供不應求，所以為左還糕債，今年初三就要開鋪呀！仲話佢地55年來未試過咁早開鋪呀！老闆仲提大家，如果出年想買糕，記住聖誕前訂定啦！其實我都有一刻衝動想買，好彩買吾到啫，哈哈。

佢地嘅年糕都吾平架，一盒要$90，睇落好似好平，但其實只得半盒滿咋（電視睇有一盒滿）。佢地有三款糕，椰汁年糕，班蘭年糕同椰糖年糕，而椰汁馬豆糕就全年都有。

一場嚟到，冇理由兩手fing fing㗎，咁我就.....買左一斤椰汁（$45）同一包椰子水（$10）啦！嘻嘻嘻，買吾到咪自己做囉。So easy，哈哈。

材料：（2 x 1L盒）

糯米粉　　　　　600g

澄麵　　　　　　150g

單晶冰糖　　　　600g

鮮椰汁　　　　　400g

椰子水　　　　　500g
菜油　　　　　　1湯匙

做法：

1. 椰子水先過濾一次，然後加糖中細火煮溶，放暖備用。
2. 將糖水全部加入粉內拌勻，然後加入全部椰汁拌至冇粉粒，最後加入油拌勻。
3. 將粉漿過濾兩三次，然後倒入模，大火隔水蒸1小時或至熟（要視乎模具大小）。
4. 出爐後，待完全放涼後，放入雪櫃儲存。
5. 食前取出，切件煎食即可。