焦糖棗仁餡（少油少糖）

時間過得真快，眨吓眼又一年啦！仲有一個多月又到中秋，係時候諗吓有咩新搞作啦！

其實心裡面一直有個疑惑，點解老人家咁鍾意食金腿五仁月呢？吾怕咬到牙都軟咩（果仁咁硬）？好似我奶奶同媽咪咁，佢地每年都會買一個自私食架，哈哈。係咪真係咁好味呢？

話時話，記憶裡，我真係從未食過金腿五仁月，因為我覺得月餅應該係甜，而金腿五仁月又咸又甜，好古怪，我接受吾到囉，哈哈。

最近見fb宣傳一款焦糖果仁月餅，所以引起我注意，因而令我產生興趣。網上都參考過幾個食譜，但最後都係跟自己舊作（狀元核桃酥），左改右改，再臨場加減，終於比我做出一款啱自己嘅食譜啦！

由於自家製關係，所以好多嘢都可隨意改變，如材料，份量，調味（果仁、棗、油同糖等），隨意加加減減，自由配搭。目的只係想食得健康，希望媽咪會鍾意我嘅隨意啦！

講番呢款月餅，除左有自己鍾意嘅五款果仁外，仲加左椰棗。如果大家想了解多d椰棗，也可上網搜尋（椰棗介紹）。椰棗除左可以煮食，煲湯，小食外，其實仲可以節食減肥呢！好多印尼姐姐齋戒月，就係靠佢咋！

靜雞雞話你知，原來做五仁月一d都吾簡單，仲好麻煩添，因為單係切果仁，都切到手軟（頭都暈）呀！吾怪得出面賣得咁貴啦！真係粒粒皆辛苦呀（除非原粒免切）！朋友們，吾好意思（太可惜），你地冇機會試到啦！因為只得限量14個咋，嘻嘻。

＊因為材料全部都係熟，所以可以即時試甜味，如鍾意多d甜，可以加適量麥芽糖。而果仁粗粒／幼粒可跟個人愛，因我做比老人家食，所以會切得比較細(吾係碎)，但仍可保留粒粒口感。

材料：（14粒）

原味即食杏仁　　　70g

原味即食碧根果仁　60g

已烘黑芝麻　　　　2茶匙

已烘白芝麻　　　　2茶匙
腰果（生）　　　　70g

椰棗　　　　　　　60g

糕粉　　　　　　　30g

無鹽牛油　　　　　10g

焦糖漿：

砂糖　　　　　　60g

麥芽糖　　　　　40g

水　　　　　　　40g

做法：

1. ＊將果仁（腰果除外），平放上焗盤，150度（不預熱）焗約10分鐘，焗至香脆。
2. 將腰果平放上焗盤，180度（不預熱）焗約15-20分鐘，焗至金黃香脆。
3. 出爐後放涼，然後切碎（大小隨意）。
4. 椰棗用飲用水浸洗一下，用廚紙抹乾，去核切碎。
5. 將果仁及椰棗加糕粉拌勻，備用。
6. 砂糖，麥芽糖，水放入小鍋拌勻，中細火煮滾，轉細火煮至啤酒色（約115-120度），離火加入牛油拌勻。
7. 將焦糖漿倒入果仁內，快手拌勻（如太乾／散，可加入一湯匙飲用水）。
8. 成糰後，分割每粒25g，放雪櫃雪一晚。

貼士：

＊即食果仁我在涼果店／萬寧買的，買時必須揀原味，製作餡料前先用焗爐翻焗一次（更香脆）。

糕粉（烘焙店或雜貨店有售）