芒果芝士蛋糕（凍）

我又買左盒Kiri忌廉芝士（折後$99.8/1kg），每次買親咁大盒，都要做三四次至清得晒。今次又做邊樣先好呢？

其實初時我係想做咖啡雲石芝士蛋糕，但後嚟醒起冰箱有芒果肉，所以就改變主意，做左呢個芒果芝士蛋糕啦！

如果做芝士凍餅，我鍾意加層消化餅打底，然後再加層海綿蛋糕夾心，令蛋糕食到更多層次，味道更豐富。雖然工序同步驟比較多，但可以一次過食到多重口感，都值得嘅。

芝士蛋糕如加入生果茸，消化餅底同海綿蛋糕，食落感覺係會輕型D，清新D同冇咁漏架。

材料：(8")

海綿蛋糕　1片（海綿蛋糕做法）

餅底：
消化餅　　120g (打碎)
無鹽牛油　35g (室溫)
砂糖　　　12g

芝士糊：
忌廉芝士　300g (室溫)
砂糖　　　60g
牛奶　　　30g
芒果泥　　220g
魚膠片　　13g (冰水浸軟)
淡忌廉　　150g (打至7成企)
芒果粒　　100g

做法：

1. 餅碎加糖及牛油拌勻，倒入蛋糕模內壓平，然後放入冰箱冷藏備用。
2. 淡忌廉打至7成發泡，存入雪櫃備用。
3. 魚膠片加冰水浸軟，存入雪櫃備用。
4. 將魚膠片揸乾水，加少許打起忌廉，隔熱水座溶備用。
5. 芝士加糖打勻，然後加奶打至滑身。
6. 分兩次加入芒果泥打勻，然後加入魚膠液拌勻，再加入打起忌廉拌勻，最後加入芒果粒拌勻。
7. 將半份芝士餡倒入消化餅面，然後放上一片海綿蛋糕，再輕輕按貼芝士餡面，雪10分鐘。
8. 取出再倒入餘下芝士餡，掃平，存入雪櫃雪兩小時以上，然後灑上防潮可可粉或生果（芒果／士多啤梨／藍莓等）裝飾即可。